Gerard Voortman
Appartementengekte
Wat zol non de verkloaring wean det in zowat alle plaatsen der alverdan mear appartementen ebouwd wordt? Het duzelt der oe mangs van. Ook Riessen wordt zo heanig an vergewen van appartementen. De meesten oerlelke pakhuze um leu in te drukken zoda'j miskien wal köant sprekken van niejmoodse bejaardentehuze.
De readen woerumme at alleman noar een appartment hen wil is det de traditionele bejoardentehuze fealijk nit mear bestoat. Nit allenig 67-plussers weelt gearne noar zon appartementencomplex mer ook veaker al 57-plussers. Det zeent dan leu dee at völs te drok zeent en zoaterdaangs gin zin mear hebt um 'n hof te doon. Dee fietst dan lewer duur Gaasterland hen in plaatse van de stroate te kearen, grös te meejn of duur het zwarte zaand hen te krabben. Geewt dee projectontwikkelaars eens ongeliek. Ze koopt ne oolde broake, gooit det van de bene en probeert der zo völle meugelijk 'levensloopbestendige' appartementen van te maken want det smit het meeste op. Het eerste gebouw, de Eschhorst is nog een heel mooi gebouw, mer doarnoa gung het vuural um de inhoold en dee de boetnkaante dee der nit meender too. Det wordt dan compenseerd duur mooie naams te bedeanken zo as Stationszicht, de Bakkerieje, Veeneborgh, Oranjestaete of Otje v Potje. Vuur het nieje Otje van Potje doar op n Dreei is ook nog nen aandern naam in umloop en dan bedoel ik nit Klein Maranatha. Heurt de mer eens noa biej de nieje bewonners zelf.
Het mooie an Klein Maranatha is det trouwens wál det 'n architect zich good hef verdeept in hoe het vroger op de Hoar was. Vroger ko-j zo duur de stalduren hen op de haanheulter kieken. Ook in het appartement rechtsboawn an de Hoar zee-j wat van dee balkens wierumme. Vroger keanden de boerderiejen an de Hoar gin terrasjes woer at de leu de zommerdag vuurboeten konnen zitten. De leu zatten dan vúúr thoes steal an de weg. De appartementen op de begane groond hebt óók gin terrrasje, en ook dee leu koant dan net as vroger gewoon op trottoir vuurboeten zitten. En achter thoes hebt ze nen nieje kapschure maakt van grove golfplaatn. Ook allemoals met een knipoge noar de oolde Hoar.
Umdet der völle vroage is noar nieje appartmenten, wil ik de projectontwikkelaars wal helpen an een poar locaties. De grote koarke: tjonge wat kö-j doar toch een mooi gebouw too zetten, het paand van Jan Heedt tot an de roomske koarke, vot met den oolden pröttel: appartementen der op, wat kan het skellen van dee mooi oolde gewels. Slikkebats an 'n Hoognpad, Keupske in 'n Boomkaamp, het paand van Dina van de Skure an de van de Broekestroate
Het zal miej eens verniejen wat der van trechte koomp.