Gerrit Dannenberg
Stoomfluite
Noa een lesten storm warren der oaweral dakpannen esneuweld. De dage doarnoa zag iej kearls gangs met nieje pannen. Ik fietsen oawer de Hoar en doar gaf nen kearl ne dakpanne an zin moat op de lädder. Völs te laankzaam, want ik heurden den enen zeggen: "Allo! Of woch iej op de stoomfluite!"
Ne oer-Riessense oetdrukking! Want inderdaad, op de stoomfluite kö'j rechtevoort lange wochen. Vroger nit. Dan heurden iej um verscheaiden keer op nen dag. Dee stoomfluite regeln lange joaren het leawensritme in Riessen.
De stoomfluite steun op 't dak van 'n Stoom en worden alle dage met de haande bedeend. Kon dus wal 's ne keer ne menute skealen, mer oawer 't algemeen gong'e op tied. Doar was'e ook vuur bedoeld, want de fluite hulp het woarkvolk onthooldn det ze noar 't febriek hen mossen.
Het was een heel typisch zwoar geluud. Het köm heanig op gaank, mer at'e op stoom was rolden den zwoaren töater oawer de huze van heel Riessen hen. Leu dee der op 't dak van 'n Stoom wal 's nöast hebt estoan, verteelden de'j dan de haande vuur de oren mossen hoolden, umdet oe aans de trommelvliezen schuurn.
De originele koppern stoomfluite steet in 'n keelder van 't brandweermuseum op 'n Oosterhof. Hee steet op een heulten vootstukn. Iej köant het verhaal van de stoomfluite vertellen an de bezeukers. Mer better zol wean a'j het geluud ook zollen können loaten heuren. Det is al 's ne keer probeerd biej het 750-joarig bestoan van Riessen, 25 joar terugge op 'n Skeeld. Ne hele slechte imitatie. Ze hadden der nen compressor achter ezat en der kleunk een heel hoog en heel dun geluud woer gin meanske het echte geluud van vroger van wierkeanden. Kan ook nit aans, want het was ginne perslochfluite, mer ne stóómfluite.
Non is oold-wethoolder Gerrit Harbers vriejwilliger op 't museum en det is nen echen Willy Wortel at um zukke dinge geet. Nen hoop leu weet det nit, mer Gerrit hef nen specialen motor vuur 'n Eantersen Zoomp oet-eveunden mer ook 'n overtoom in Zenoa, zodet 'n zoomp ook oawer dee vistrappen hen kan. Gerrit hef de stoomfluite met-enömmen noar de Waarf in Eanter. Doar hebt ze een stoomapparaat woer ze de plaanken vuur een zoomp roond met maakt. Fealijk is dee mesiene nit geschikt vuur de stoomfluite. Mer tóch is in dee stoommesiene druk op-ebouwd en toen hebt ze de stoomfluite der an-edoan. Wal 4 seconden laank kleunk de stoomfluite toen wier net as vroger. Keaihard!
Mer veer tel... Laank genog, want de plietsie köm al jaagn!