Marieke Dannenberg
Gin vleais
Van 5 tot 11 meart was de eerste Nationale Wekke Zoonder Vleais. Dit initiatief hef as doel det de leu nit mear elken dag vleais of vis et. Veaker nen dag gin vleais of vis etten is ne kleane möaite met nen groten invloed op means, deer en milieu. At nen vleaisetter één dag gin vleais et, bespoart'e 7 moand an douchewater, 114 kilometer autojagen, 1 henne en 7 moand woark vuur nen boom. Nen boom zet namelijk CO2 umme in zuurstof.
Völle leu kömmen der pas achter det 't de Nationale Wekke Zoonder Vleais was in de wekke zölf. Dus alleman har de boskoppen vuur dee wekke allange in thoes, inclusief nen lekkern biefstuk vuur 'n zöndag, kipfilet vuur moandag, vuur woensdag netuurlijk gehakt, op doonderdag ne slavink, op vriejdag vis en zoaterdag petät met ne frikandel. Dus van dee wekke-zoonder-vleais bleef allene 'n deensdag-zoonder- vleais oawer.
Gelukkig zeent 'r ook nog leu dee et oet nen moaltiedbox, zo as Hello Fresh, De Krat of de Allerhande Maaltiedbox. Dee moaltiedboxen zeent netuurlijk al heel lange van tevuurten in-eprogrammeerd. Dee zorgt dus vuur ne vegetarische wekke. Biej mien va en moo hebt ze de Hello Fresh-maaltiedbox. Mien moo is d'r dol op, mien va meender, mer heur iej ne klagen? Dus toew ik dee vleaisloze wekke biej mien va en moo anschöaf, wes der een plantaardige diner met ne vegaburger.
Persoonlijk zir ik tegen op vleaisvervangers. Iej et gewoon ne moaltied met of zoonder vleais. Woerumme zo'j iets etten wat smaakt noar vleais, terwiel 't gin vleais is? Het lik wal nen bak: het smaakt noar gehaktbal, het rök noar gehaktbal, het zöt eroet as nen gehaktbal, mer het is gínnen gehaktbal. Roa-roa wat is het? Stiekem toch ne gehaktbal, mer dan van sojabonen. Kipstuckjes, gerookte speckjes en gehackt van De Vegetarische Slager komt er dus biej miej nit in. Vake smaakt het er ook nét nit noar, dan kö'j toch better noar de Keurslager hen goan!
Mer ik wazze dus biej mien va en moo en dan et ie wat de pot schaft. Mer non bleken dee vegaburgers toch wal lekker te wean! Zelfs mien va at nen burger met smaak op. Hee kon zelfs nit geleuwen det het gin vleais was: "Dizzen burger is zo lekker, der zal wal ne weule in det sojaveld hebben ezetten!"
Marieke Dannenberg