Gerard Voortman
Beume
En wíér is der in Tweante een kleain buske esneuweld. Doar biej dee nieje boerderieje van Stamsnieder in Boarnerbroek. Iej komt der langs a'j van Eanske oawer de E8 wier op 't hoes an goat, um precies te wean biej hectometerpöalke 138,9. Nee, een mooi strak buske was het nit, der steunen ook gin mooie rechte beume. Het was mear een weeldernisje; nen postzeagel van opslag, skeve knotwilgen en 'n poar pöppeln. Zo milden in de weaileande een mooi buske vuur klean weeld um te skulen en veugele dee at eawn oet woln rösten.
Het buske passen vermoedelijk nit biej dee nieje strakke boerderieje. Het is non mooi um-ebouwd, der is grös in-ezeaid zodet het grösmeejn temet minstens 6 minuten gaauwer geet en doar geet 't netuurlijk umme. Ik zir nit zo van de subsidies, mear zonnen boer zo'j toch munn compenseren zodét zon buske kan bliewen stoan.
Nen moojn boom zorgt vuur structuur in ne plaatse, in 'n hof en de stroate. Iej köant oe de vuurkaante van de Scheeldkoarke toch nit vuurstellen zoonder dee eeken?
Netuurlijk gef nen boom oawerlast, benaamd in 'n hoarfst woer 't oe al dee blaadn in 'n hof valt. Dee kö'j loaten liggen en det is zelfs better vuur de structuur van de groond, mer de meeste leu in Riessen hoarkt dee blaadn der oet. Doarvuur plaatst de gemeente zelfs van dee grote körve langs de weg um 'n kroam in te smietn. In een lesten januoaristorm zeent der gloepens völle beume umme-goan. A'j doar biej de volkshoge school Diependaal richting de Borkeld goat, zeent der - zo 't lik - méér beume umme-goan dan at 'r zeent bliewen stoan. Het lik wal of de ceanten op zeent biej Staatsbosbeheer want een poar moand later is der nog niks in 'n bos gebuurd. Der wordt nit ezaangd of zo; ze loat een kroam gewoon liggen, behalve dee smalle pädjes woer 't det mountainbikevolk op rosket. Dee zeent binnen ne wekke beume-vriej emaakt. Het is gewoonweg gin gezichte.
Wat miej biej een lesten storm ook is op-evöllen det der opeens völle méár beume zeent ummegoan as op een dag van een storm zelf. Leu dee 't aaltied al gearne den rotboom vuur of achter in een hof kwiet wollen, nömmen de strekke woar en zaagn zonnen boom dreks umme. Heel klook miskien want ginnen haan kreejt 'r noa en wee zeg miej det den boom nit per oongelukke waankeln en het dus veailiger was um den boom vot te doon. Doarbiej zelfs nog wal mangs krokkedillentroanen van 'wat jammer nu dat onze lievelingsboom omgewaaid is'.
Iej monn eens weten.
Gerard Voortman