Gerrit Kraa
Bril
De leu wordt gemiddeld alverdan eulder, mear bliekboar ook gebrekkiger. A'j de reclamespotjes mangt geleuwen, weejt het van de slechte oren en ogen. Via de reclame wordt het oons gedurig in epepperd.
Dat geet dan via filmspotjes, woer a'j kennis maakt met ne massa seniele, zielige figuren. Ne jongedame stapt oet nen trein en löp oawer het perron in de richting van nen sulligen vriend, den gedeuldig steet too te kieken woedöanig zin meaken nen oalen keal um 'n haals vaalt en langdurigen smokken votgef. Dat is toch bizar: a'j een betje keal zeent, griep iej den oalen keal en knip iej een geatje in zinne oren met de kaartjes-tange van 'n conducteur, ik neume mear wat.
In een aander spotje zee'j dat zelfde stel in romantische kleare oet Engelse klassiekers op mekoar ofvlegen en dan draaft ze mekoar in volle vaart vuurbiej. Het is te hoppen dat op dat natuurterrein oarns ne psychiatrische inrichting steet, woer ze kortzichtige leu behaandelt, onnit dan. En dan aait den slogan an 't eane: "was nou maar naar Dinges gegaan".
Mear het kan nog slimmer: eers ha'j ne reclame met Jantje Smit, den zogenaamd zo slech zag duur nen verkeerden bril op 'n snoeten. Met daank an wier nen aanderen brillenweenkel zung Jan dree moal het moark van dee firma. D'r zeent reclameburo's dee biej gebrek an originaliteit dan zo'n spotje domweg noa-aapt. Non zee'j dus wal twentig moal op één dag René Froger biej nen drogist binnenstappen um doar as nen debiel te goan zingen dat-e nen bril wil van Eye-love. En dan keump d'r zonne griezelige helpster in een knalrood kleedjen semi-jolig op René ofstappen en slept um dan vuur nen brilcomputer en dan gef René zo'n weerzinwekkend dubbel-focaal knipeugke en begeent-e nog wier 'n moal te zingen dat-e zo gek is met dat brillenmoark. En dan te bedeanken dat dee reclamespotjes zo roond het acht-uur-Journaal mear as 1000 euro kost! Wee betaalt al dat geald oeteindelijk…?
Al dee brillenreclame dut miej deanken an dat gedich van Johanna van Buren, dat geet oawer nen Eantersen sik den gin heuj wil etten. 'n Boer zet um nen greunen bril op en dan dech den sik dat het gellige heuj greun grös is en dan wil-e wal vretten. Kan wean dat dit een idee is vuur ne nieje reclame en kan René Froger as sik optreaden. Mekkeren kan-e al as de beste….
Gerrit Kraa