Gerard Voortman
Keze en Worst II
Traditiegetrouw maken ik kortens een tweeden keze-en-worst-oawend met biej dee möage van Steunenberg dee at met heftrucks doot. Tehope met Ronald Vrijenhoek hooldt dee gäste een doarden doonderdag in de moand meart eure businessclubbiejeenkomst. Biej de meeste businessclubs hebt ze een bestuur, notulen, regels um lid te können worden, ze mun meestieds zo'n 5 moal per joar iets bedeanken woer at de leu in geïnteresseerd zeent, het kost lidmoatschopsgeeld en weet ik wat allemoals nit mear. Den keze-en-worst-oawend is wat dét betref een vriejgevöchten gebuurn, mear loat wean wat wil, het geet der plezerig an too, gin skewe wöarde, gin plakplaatjsesvolk, gin muziek, gin lewoai. Gewoon ne melkbusse vuur ne vriejn gift vuur een good doel. Gin ingewikkeld gesnisterde häpkes, nee gewoon dree soorten keze, een poar mear soorten taampere worst en fijne hearingen van 'n Dub zinnen opvolger. En netuurlijk twee soorten beer (a'j Heinekes ook vuur beer mettelt) cola, rivella (mocht Bernard Kobes nog eens kommen), wien en aandere lala. Gin sprekkers, mear ik maken wál dree mini-colleges met van dree ondernemmers dee at in het grote geeld zit. Doar is het netwoarken netuurlijk ook vuur bedoeld. Notoaris Matthijs Davids kuieren miej biej oawer het huwelijksgoederenrecht en vreug zik of de veraanderingen doar in nit interessant zollen wean vuur ondernemmers. 'Tuurlijk Matthijs, trekt oewne zakelijke klaanten oet de kaste en neudigt ze biej oew op ketoor oet'. Jan Harbers (vuurmalig vrachtwagendealer en non projectontwikkelaar en vee-leefhebber) constateren det de leu met ne oolde broake vake té lange wocht op langskommende projectontwikkelaars, deankend det ze doarmet de hoofdpries vangt. 'Ik rekke aaltied hoevölle appartementen kan ik doar en doar kwiet, wat köant dee opbrengen, wat zeent de bouwkösten, wat wil ik der an winnen en dan blif het bedrag oawer wa'k kan beeden. Iej zoln zowat medelieden met Jan kriegen, mear wal interessant. Maarten Otten verteeln oawer de snorkelhypotheken, det zeent bezwoarn op huze , heuger as de wearde van 't hoes. 'Verget nit det der in Riessen ook wal vake völle eleend wordt. Noäst jeugd met geeld en de gemiddelden spoarders is der ne categorie jeugd dee at gin kwartje hebt en wal een hoes weelt kopen'. Viej distern nog eawn oawer wát de wearde is van 'n hoes. Is det noar de berekkening van de makelaar of wat der nen gek vuur gef? En ik had nog nooit eheurd van het Jan Willem Tusveld effect. Den jonge van de Koejanzes den at zik in Riessen reurt duur onroerend goed op te kopen en doar wordt de huze jums nit gekeuper van.
Zo heu'j nog eens wat.