Gerrit Dannenberg
Woar of nit
Zoonder verhalen kö'w nit. Hoaste ne leawensvuurwaarde. Viej zeent 'r met groot-ebracht. Verhalen van oonze oolders toew klean warren. Vlak vuur 't sloapen, zó spannend da'j doarnoa mangs al geent konnen sloapen.
Mer vergist oe nit. Ook grote leu hooldt van mooie verhalen hoolden. Toen dee wichter klean warren gonge viej met nen aparten dag nog wal 's ne keer noar het Land van Jan Klaasen, vlak biej Dieren in Geelderlaand. Doar hadden ze inderdaad nog ne echte oolderwetse poppenkaste. Iej zollen zeggen: in dissen digitalen tied haalt zonne poppenkaste niks mear oet. Mer vergist oe. Jan Klaassen en Katrijn bekken met mekoar as aaltied en de zale geneut. Vuural de oolders. Det völ gewoon op.
Op het Riessens Museum komt nen hoop leu dee wat weelt weten oawer het verleden. Mer ze weelt vuural geane mooie verhalen heuren oawer het verleden. En of de verhalen woar zeent of nit, fealijk maakt det de leu nit zo völle oet. Oonzen roondleider Dick van Brussel vrög de leu aaltied eerst: wat wi'j heuren: woare verhalen of mooie verhalen? Neeng van de tien keer kiest de leu vuur mooie verhalen.
Jan van de Maat, oonzen conservator, is kortens eridderd vuur al zin belangeloze vriejwilligerswoark. Een verdeend leentje, veune viej en de koning ook. Jan verteelt aaltied wóáre verhalen. Det heurt ook vuur nen conservator. Vuural at Jan in de Opkamer steet en doar verteelt oawer oons bescheaiden gedeelte van de Van Heel Keunstcollectie. At Jan doaroawer verteelt is'e aaltied bloodserieus. Wat hee doaroawer verteelt is ook gewoon woar. Mer alverdan heel serieus wean vaalt nit aaltied met. Lest was der een gezeelschop dames. Ze steunen heel geïnteresseerd te lustern noar het keunstzinnige verhaal van oonzen Jan. Jan zat 'r helemoals in. Hee lea alns heel dudelijk oet. En toen köm der ne onverwachte vroage. Ne vrouwe wees noar de oawerbekeande reproductie van Willem van Oranje den an een groten schossteen haank. Jan zea gedeuldig det ne reproductie was van oonzen Zwiege-Wilm. Mer de vrouwe wol 't nöadje van de kouse weten. "Maar dat is toch geen schilderij, maar een foto??" En toen kon 't Jan nit loaten en hee zea: "Klopt mevrouw, dat is een foto. De enige foto die ooit van Willem van Oranje gemaakt is hangt hier."
Gerrit Dannenberg