Gerard Voortman
Dreanthe
Kortens wa'w een poar dage fietsen in Dreanthe. Dreanthe? Jea, Dreanthe. Op de zaak kiekt ze miej dan een betjen miszeun an. Ach, iej doot doar allenig met a-j met de meaivekaantie ne volle wekke noar Sicilië hen goat, met kammeröa goat mountainbiken in Madagaskar of goat stedentrippen in Italië. 'Oh ja, Drenthe is ook wel leuk' kan der nog net of.
Netuurlijk is der op Dreanthe van alns an te moarken. Het is aaltied achter-eblewen en het mist ook de vechtersmentaliteit wa'j rechtevoort toch munn hebben. 'A-w het vandage nit doot, dan moarn mear, in plaatse van de 'wil om te winnen'. Dreanthe mist ne grote rivier en het mist ne mooie historische stad en dan is de antrekkingskrach al bedudend meender. De hoofdstad Assen hef de grandeur van de Riessense Vennekensgaarden, de Almelooske Rietstroate of van Lelystad. Dreanthe is vuural bos, zaandpädte, bos, zaandpädte, beume, bos, plaggenheupe, zaandpädte en nog eens bos.
Ze hebt hunnebedden, ze hebt Ot en Sien, ze hebt Ellert en Brammert, ze hebt plangnhutten en ze hebt vennelieken.
Nit vuur niks is Dreanthe doarumme de dunstbevolkte proveencie van Hollaand, de leu wont benaamd in de dorpen en op het plattelaand. Dreanthe keant ook gin beursgenoteerde bedriewe en ook Quote 500-leu zeent 'r beteun. Deanthe hef ook nooit écht profiteerd det de NAM doar het hoofdkantoor hef en ook van de öllie- en gaswinning is vuural een aander better eworden. Dreanthe hef nen mooin dierentuin in Emmen, ze hebt de TT-Assen en dan hooldt het wal zo'n betjen op.
A-j dit least, dan zo-j oe woarn noar Dreanthe hen te goan. Niks is meender woar. Juust umdet ze het doar zo heanig an doot, gef det een soort permanent vakaantiegeveul. De leu helpt oe ongevroagd a-j de weg liekt kwiet te wean. A-j knooppeuntenroutes fietst dan mu-j nit rekken det ze biej de minste of geringste weg-ofzetting de brödjes anpast. Dan mu-j oezelf mear redden en dan vroag iej in Dreanthe dus nit mak mis.
A-j doar zo roondfietst dan vaalt het op det oe ook alleman toosprek ook al zi-j gin kunnigheaid. Het lik of alleman tied hef en viej koant as Riessenders zo met eur dialect metkuijern.
Mooi fietsen doar in Dreanthe dus. Weainig last van de weend vanwege het laandschap mear wal last van ongemak. Het bealdern van de jonge kleane ruupkes oonderweg. Op een gegewen momeant dachen viej da-w de eikenprocessierupsroute (mooi woard vuur galgje) an 't fietsen warn.
Gerard Voortman