Gerrit Dannenberg
Rekkenlineaal
Ik heb 'n heel oolderwets rekkenmesientje. In 1979 ekregen van min breur den toen nog biej Kruutnbearnd woarken. Der is in al dee tied mer één keer ne nieje batterieje in ekömmen. Ik make nit zukke ingewikkelde sommen, aans ha'k vaste wal mear stroom gebroekt. Ik gebreuk um 't meeste um het gemiddelde antal fouten van proefwoarken oet te rekken en vuur de ciefers van de leerlingen. Het hardplastieken hoesje is kapot. De beaide helften bliewt an mekoar met zon dik ellestiek van de postbode. In de klasse begunnen de möage vake te lachen a'k dee oolde mesiene vuur 'n dag haalden. Ik heb ne nooit vot-edoan, want ik redden der miej prima met. Ik zir der fealijk slim an ehecht.
Mer det keump oaweral op de wearelnd vuur. Een kammeroad van miej was op vekaansie in China. Van doaroet wol'e kaarten steuren noar Hollaand. Op 't postkantoor in Peking kochen'e postzeagels. 'n Postchinees rekkenden op een rekkenmesientje oet wat'e mos betalen. Oonderwiel at min kammeroad de ceanten pakten, zag'e oet 'n ooghook det 'n Chinees het totaalbedrag nog eawen noa-rekkenden op een telraam oet de bureaula… Kan onzekerheaid wean ewes, mer ik deanke det hee – net as ikke - hecht is an zin vertrouwde stukke gereedschap.
De rekkenmesienen zeent de ofgelopen joaren froai moderner ewörden. Op 't display kö'j de hele somme zeen de'j weelt oetrekken. Op det oolde mesientje van miej nit. Mer det gef nit, umde'k der an ehecht zir.
Dichter biej de dure ha'j in Riessen joaren geleden nen directeur van 'n bekeand bouwbedrief. Der warren nog gin elektronische rekkenmesientjes. Iej deden alns oet 'n kop, iej gebreuken papier óf zonne rekkenlineaal, vuurloper van de rekkenmesiene. Duur heandig te goocheln met 't lichaam, de skoewe en 'n leuper van dee rekkenlatte konnen klooke leu de meest ingewikkelde sommen heel gaauw oetrekkenen. Aaltied ongevear netuurlijk, want op dee rekkenlinialen kree'j oetkomsten-biej-benadering.
Ne keer zatten 'n directeur en de projectleiders van det bouwbedrief te vergadern. Ze warren an 't oetrekken hoo völle vertraging nen groten bouw zol oplopen a'j 4 x 4 wekke reagen hadden. 'n Directeur scheuf eawen met de rekkenlatte en zea vlot: ongevear 16...
Gerrit Dannenberg