Mu'j toch ees heuren…
-Keal en gin eane… jonge, jonge, poj, poj, och heden, och heden.
-Wat is d'r, wat he'j?
-A'j dat is wussen, ik dachen, loa'k dreks bellen. Dan heb iej het oet de eerste haand. Mear zengt nit dat ik 't oe ezeg hebbe.
-Zo woar as ik leawe. Ik zal 't gin meanske zeggen, kö'j vaste van op an.
-Keal en gin eane, zea'k al, mear wat ik now toch eheurd hebbe, ik geleuw minne egen oren nit. Ik zin d'r nog vuur alle zekerheaid met noar ene van dee oordokters ewès, en iej weet wal dat ze doar oe geane een poar van dee lusterdöpkes ansmeart mear het was nit neurig. Doar gung miej nog niks mis, achter den computer. Dus doar lag het nit an. Ik har het wal degelijk good vernömmen.
-Iej maakt miej niejsgierig. Zengt dan toch wa'j miej wilt vertellen!
-Tja, non kan ik oe wal pardoes vertellen wat ik te zeggen hebbe, mear ik weet nit o'j dat wal an köant. 't Hatte verskeut miej, toen ik het vernömme, dat kan ik oe wal vertellen, dat kan'k.
-Zengt het gerus, ik kan wal tegen ne stötte. Ik hebbe genog met emaakt in min leawen. Ik kieke noars mear van op.
-Dat zeg iej now wal mear dat kon toch wal ees ietskes te oawermeudig wean. As iej heurt wat ikke eheurd hebbe, now dan is 't nog mear de vroage woedöanig a'j doar op reageert.
-Heur ik non da'j miej oonderschat? Da'j deankt dat ik een bleudje zin, nen koekeldoris?
-Nee, nee, dat heur iej miej nit zeggen. Mear toch, gin meanske is onkwetsboar. As ik oe zegge wat ze miej doar net an erekket hebt, dan kö'j doar nog wal ees aans oawer kommen te deanken.
-Getjan, now án of ván. Wat wo'j miej zeggen?!
-Hendrik, het geet oe helemoale niks an…..
(P.S.) Hendrik en Getjan sprekt mekoar de leste tied nit mear too…