Gerard Voortman
Gaskraan dichte ?
Seends det ze doar in Slochteren ontdekken det der gas in de groond zat, wa-w met zin aln de konik te rieke en ruilen viej dee smearige hoolt -en kolnkachels in en gung heel Hollaand an 'n gaskachel.
Gas was skone en gekoop en viej hadden der genog van. Wat ne wealte. Gin geslep mear met koln of gegadder met hoolt. Noa de gewelkachels kreeg zowat alleman centrale verwarming en ontwikkeln zik de kettels tot hoog-rendementskettels.
Gas was makkelijk te transporteren en nóg makkelijker te exporteren. Det leste was dan vuural wier good vuur de staatskas. In de tied van Joop den Uyl stromen het geeld binnen en oonder zinne regering was spoaren oet den boze en wörn de gasopbrengsten gebroekt um de lopende exploitatie kloppend te maken. Hoe dom kö-j wean. Wat det betreft zeent ze in Noorwegen kloker, want doar pot ze de öllieopbrengsten op vuur slechtere tieden.
Tot op het momeant det ze in Groningen las kregen van aardbevingen en huze dee at an 't verzakken warn. Heel vervelend, mear dan mu-j dee leu doar helpen en nit zo as Eric Wiebes, heel zeunig wean en de leu met onverkoopboare huze loaten zitten. Oonderdoems begeent de oawerheaid ne fikse anti-gaslobby van vot-met-det-gas, zunnepanelen op 't dak en ne woarmtepoompe in 't hoes.
En toen spreuk ik met het boskopn doon Wichard van Jan van Bram. Wichard dut met kachels, centrale verwarming, gasheardjes en spil, is good vakman en zit al sinds joar en dag an het begin van de Hoar. Ik vreuge Wichard of-e al kon vernemmen det de leu gin gasgestokte kettels mear weelt. Het was net o-k hum an de grepe steuk. 'Ik heb nog nooit zo völle kachels verkocht as de leste tied. "Gas? Gas blif aaltied, onthooldt det van miej. Rekkent der mear op det woennear a-w wier crisis hebt en oons laand geeld tekort koomp een gaskraan wier wiedwaangs lös geet. En den Wiebes ? Den blif nit, den kuijert oet 'n nekke."
Een poar dage later leus ik in het Financieel Dagblad det der nog nooit zo völle vroage is noar gasgestokte CV-kettels. Zol Wichard dan toch geliek hebben? Netuurlijk hef Wichard geliek, mear hoe lange nog.
Ik hoppe het nit, mer ik zir namelijk heel bange det Wichard gin geliek krig. At de oawerheaid oons toen án 't gas wol hebben, lukken eur det. En at dezelfde aowerheaid oons van 't gas óf wil hebben, lukket det ook. Geewt mear eens acht: vuur a-j 't weet krie-j de gastax.
Kö-j het nog volgen??
Gerard Voortman