Gerrit Kraa
Vekaansie
"n Exodus oet Tweante is begunnen. Wied vot of dichte biej thoes. Hele discussies vuurof in de femilie. De va wil noar Bretagne, de moo noar de Veluwe, de wichter noar 'n vekaantiepark met alns d'r op en d'r an. Wat doo'w?
De moo kik noar de vekaantie-adverteanties. "Hier! röp-e vanachter de kraante: "Mooi! Mu'j ees lusteren: te huur, vakantiehuisje in de bossen, naar een ontwerp van een architect uit de joaren '50".
Ze gungen zoaterdaangs dreks kieken of 't wat was en joawal, 'n gleujnig mooi huuske, in originele staat: skune pootjes oonder de steule en 't kloostertöafelke, 'n Bruynzeel-anrech, ne kleane pendule met mini-skune peutjes d'r oonder op 'n skosteenmaantel, nen bamboestool, nen gemakstool van artifort, en 'n höfke met salvia's - zelfs de viooltjes waren ontwörpen duur 'n architect himself. Dat most 't wean! D'r lea een zwemwater in de buurte, doar konden de wichter zik oetleawen en zo köm het memeant dat 't spil vertreuk.
D'r steun verestig een petrolie-stel op 't granieten anrech en d'r lea 'n recept biej van suddervleais dat d'r 'n helen dag oawer mos doon um mals te worden, kruden oet 't höfke d'r biej en dat leek Mina wal wat. 's Moarns noar de stranden, 's oawnds achter 't zoervleais. 'n Eersten deenkseldag gung de femilie biejtieds de dure oet. Het petroliestel bleef zachjes braandend acher, de panne met vleais d'r op.
Nen prachtigen dag, an de wichter harren ze gen wichter an, meu en voldoan wier op 't architectonisch verantwoord vormgegeven huusken an, en tja, vuurspelboar: het petroliestel har toch ietskes te hoge estoan, was goan walmen as 'n Boeldershook in Hengel. Alns zat oonder de zwatte dröaks, ne vette roetloage en non iej wier.
'n Gelukke: in de femilie nen bessen plear bouwvakkers. Solidaire leu, ne complete divisie. Benny, projectleider, maakten een reuster, ze kömmen parkeerpleatskes te kot, hoge druk-spuiten, bössels, abro, soda, bleekwater, poetsen, skrobben, veagen, zoegen, toen de vekaantiewekke vuurbiej was, steun 't huusken d'r spic en span biej. De femilie kreeg complimeanten met: nog nooit was het huusken zo skone op eleawerd, ik daank oe dat 't soest. De wekke doarop lea de moo in de hangmatte oet te rösten en zat de va verbitterd te visken an de Regge, en de wichter konden de naams van de hele femilie, inclusief de kole kaante, oet 't heuwd opröatelen.
As beloning kreeg de femilie een ettentje met hamburgerstuutjes. De va steun achter de barbecue. D'r köm gin petroliestel an te passe…
Gerrit Kraa