Spinneköppe
Viej hebt 'n heel mooin zommer achter de rugge. Gelearde wearleu zegnt det 't allemoal te maken hef met El Nino en 't opwoarmen van de wearlnd. Het wear is op 'n biestern, gletsjers skoewt met te völle vaart dealten, biejmeeskes breudt 'n poar wekke te vroog en leu met 'n dreug vel hebt väker last van skin. Oet de statistieken van 'n shampoofebriek blik det 'r völle mear anti-roosshampoo is verkof an dee skinheads. Iej köant ook gewoon zeggen det het 'n oolderwets zommer was. Het verskil met vieftig joar verleden is det 'r gin airco's warren, weainig koelkasten en in Wierden was nog ginne golfbane.
Twentig joar terugge mo-j hen tennisen um d'r biej te heuren, mear det dut rechtevoort Jan en alleman. Wi-j d'r non 'n betje biej heuren, dan mu-j golfen en doarumme z-ik seends kort lid ewörden in Wierden. Umde-j de golfstökke al biej de Aldi köant kopen, dachen ik dat dissen tak van sport ook al redelijk gewoon was, mear dat was nit helemóáls good. Nit det ze oe mutten vroagen zo as biej de Lions of de Rotary, mear d'r skealt alns nit an.
Völle wille he-k nog nit ehad van het lidmoatskop biej de Koepel, want de dreugte maakten van dee greune weaidens een rood veeld en in augustus ko-w de bane nit mear op. Iej konnen heugstens op de driving range van oe ofhouwen, mear doar doo-j het nit vuur. Ze deden der alns an um de greens greun te hoolden, mear het kosten heel völle meuite. En at de leu dan ook nog last van de hette hebt en nit köant wat ze in de gedachten hebt, reageert ze as kleane wichter en wordt ze um het minste of geringste zo hellig as nen spinnekop. Zo ook biej 'n lesten clinic. Noa het douchen, har ene van oons 'n bril nog nit op en stopten doarduur per oongelukke het verkeerde i-phoontje in zinnen leenkergolfskoon moate 42 en gooiden doarnoa beaide skone met nen zweej in de sporttaske. 'n Half uur doarnoa köm nen golfbreur met heel völle lewoaj het terras op bosken. Viej zatten net achter 'n angenaam stelke: 'n mooi glas roodn wien en 'n fijn segoärken. En non zo-j 't hebben. Frederick Pieter Jan van B. was knetterhellig, leup rood an met broes op de lippen. Hee had zin golfmöatje met zin tellefontje loaten bellen en het geluud kömn non ineens oet de taske van ene van oons………
Gelukkig is het non hoarfst. Mistige weaidens, vallende blaadn, mangs stofreagen en nen spinnekop op de leenker kennebakke. Doar wordt zelfs leu dee 't I-phoontje kwiet zeent röstig van.
Gerard Voortman