3-d printing
Net as de bookdrukkeunst wordt het dreedimensionale printen ne soort nieje industriële revolutie. Det geet vearder as het oezelf oetprinten van ne nieje ketnkaste umdej der nen börs in hebt, nen eagen ontwörpen niejn bril of het vervangen van een kepot stuk lego. Det is allemoal nog van het doe-het-zelf-nivo, nee, het geet völle wieter.
3-d printing zet de hele wearldn op 'n kop. Woer is de tied e blewen dej noar de baanke hen mossen vuur geeld en het aowermaken van acceptgiro's. Der koomp zowat gin meanske de baanke mear in, iej koant alns thoes, of op oewen kloke telefoon. De leu koant en weelt alns zelf. Febrieken en vuurroad hooln is temee verlieden tied. . Wat is het dan meuier om zelf eawn een programmaatjes op te halen en det noar oewen 3-d printer hen te steuren den at het oew in een poar tel trechte maakt.
Op dit momeant het is het thoesgebroek nog vuural vuur kleainere dinge van plestiek. Op 'n doer köj zachte materialen printen, iezer, stoal, aluminium, mear ook etn en tal van aandere dinge.
Wil iej nen veerkaanten gehaktbal, iej oart grotter, dén oart zoolter, dén oart vetter, het maakt nit oet, iej geewt oew recept duur en doar print oewen 3-d printer oewen eensgemaakten gehaktbal. Kán nit besteet nit, aj oaweral ne tekening en recept van hebt, kö'j biej wieze van sprekken alns zélf maken.
De wearlnd geet lös vuur de bedeankers van nieje producten en der is op 'n doer zowat niks mear wat oew tegen hooldt. Mear ook de gewone man den at wat bedecht, kan de gedachten umme loaten zetten noar ne technische tekening en dan printen mear.
Noar Mars hen zal op 'n doer können. Een poar 3-d printers met, een poar containers met poeier en aandere bestanddelen en waj doar boawn in de locht neurig hebt, maak iej doar op de stea trechte.
Zeeknhuuze stoat te springen um gangs te goan met het oetprinten van organen, van implantaten, van protheses, van bloedvaten en van kraakbeen. At det allemoal anslöt wil iej nit weten wat der allemoals meugelijk is. Nen nieje hartkleppe ?, eawn een fotootje maken, en der wordt precies op moate ne nieje hartkleppe maakt. De huppe versletten köj oplössen duur nen niejen te printen en der oe in loaten zetn. Ne neuze op de rugge? Gin probleem; iej zengt het mear, doar make viej der gewoon ene van en met eengsgemaakte embryonale stamcellen, loa-j het der op greuien.
In het begin zal het allemoal nog froai deur wean, mear ook det zal rap aanders worden. Goat de mear van oet dej binnen vief joar zo'n 3-d printer biej de Action köant kopen en iej via internet alle meugelijk groondstoffen köant bestellen.
Netuurlijk geet het allemoals nit van vandage op moarn mear het zal gauwer goan a'j deankt.
Geewt mear eens achte.
Gerard Voortman