Evert Voortman
Vurige wekke doonderdagmiddag was in 't Park 't ofscheaid van Evert Voortman van de Rabobaanke Riessen-Eanter. Hee geet officieel op töafelkesoawend met pensioen en wordt op-evolgd duur Hans van 'n Breenks. Nen hoop mooie wöarde zeent 'r ezegd. En zo heurt det ook biej 'n ofscheaid. Mer in de kraanten leaz-iej vake nit wat zon ofscheaid tot een móói ofscheaid maakt. Loa'w doarumme nog eawen noa-dieseln.
Nen fossen vearen in 't gat, zit nit makkelijk. Zo gong 't Evert ook, net as een poar joar terugge toen z'um dee ridderorde deden. Hee löt det ongemak dan ook eawen vernemmen. Dan zeg'e dinge as: "Geleuwt alns nit" of "nemt het vuural met nen korrel zoolt."
Evert zinnen opvolger, Hans Brinks, dee um "Het Allerleukste Opa-book", want vuur zinne twee potnötten is Evert net zonnen geveuligen groffa as aandere geveulige groffa's.
En heel biejzeunder: op 't scheaiden van de moarkt heurden dee eai-volle, grote zale van 't Park Evert hardop pochen op zinne baanke: "Je kunt wel zeggen dat we hier in het oosten wat behoudend zijn, maar wij hadden wél als eerste de jongste vrouwelijke commissaris van Nederland." Det klopt inderdaad, want Janneke Kreijkes was een poar joar terugge met 26 zommers inderdaad een jongsten vrouwelijken Rabo-commissaris. Volgens Evert is de rest van 't laand skieliijk evolgd. Loa'w hoppen det de baanke Janneke kan vaste-hoolden, mer ik weet nit…. Ik heb al heurd det'e hen vriejen geet noar Genemuden. Mer vruit, ofstaanden telt rechtvoort alverdan meender en de snelweg tusken Zwolle en Almelo koomp der vaste nog wal ne keer.
Zo mear geeld oawer 'n balken goojn hef Evert nooit edoan. As ofscheaidskedootje löt hee gin kostboar monumeant noa, mer met de gemeente is of-esprökken det een gemeentelijken bloombak vuur de dure van baanke een "Evert Voortmanbloombak" mag worden eneumd.
Wat wál opvöl was det Evert vuural van de leu in Eanter zea det ze geveul vuur humor hadden. Zukke dinge hardop zeggen is netuurlijk aaltied heel gevoarlijk. Want a'j der ene oet 'n schoof trekt….dan doo'j aandern al gaauw tekort. Het Riessender volk zol al vlot können deanken det ze meender geveul vuur humor hebt dan de noabers oet Eanter… Mer Evert is duur de joaren hen netuurlijk zelf ook alverdan mear Riessens klook ewörden. Want a'j noa oew pensioen in Eanter weelt bliewen wonnen is 't vanzelf nit verkeerd um biej 't ofscheaid nog eawen hardop te zeggen det de leu in Eanter geveul vuur humor hebt.
In Riessen veende viej det wal humor.
Gerrit Dannenberg