Mattheüs
Ene van de gebroekelijke dinge roond Poasken zeent bevuurbeeld de Tweantse poaskearls oet Ootmöske. Hef vermoedelijk nit zo heel völle te doon met woer at het met Poasken éch um te doon is, mear vruit, det zeent dan ook tradities.
Net as poas-eaier, poashazen, poaskniene, de poasboake, poasversiering, poashartjes - de Riessense bakkers maakn vroger allenig roond Sunterkloas speculaashartjes, mear non dus ook al roond Poasken - moandag te Poasken, poaszangdiensten, poasshows en zo kö'j nog wal een zetjen verdan doon. Het meeste umwille van de business. De meest biejzeundere traditie is miskien wal de oetvoering van de Mattheüs Passion. Wat ne riekdomme kriengt al dee seculiere regeringsleu met as ze roond Poasken in Naarden de joarlijkse Mattheüs heurt oetvoeren. Dree uur laank krig de regering en völle Kamerleden dé boskop woer at het éch met Poasken um te doon is en det is te priezen.
Via vakantieveiling kö'j vuur nen krats kaartjes kopen, disse moal wa'w in Apeldoorn biej de oetvoering duur Pieter Jan Leusink. Pieter Jan kenne viej in Riessen vuural van het commerciële Riessense Mannenkoor. Hee bracht het koor tot gröttere heugtes, der köm vanof dee tied mear publiek en het koor wör een soort bedrief.
Hee teuweln zin Elburgsstadsknapenkoor umme tot een Holland Boys Choir, want det kleenkt better. Het jongenskoor is verleden tied, hee zeenk en musiceert non met The Bach Choir & Orchestra. Whats in a name, mu'j dan mear zeggen. Hee stun doar dus wier in Apeldoorn te dirigeren. De meeste dirigenten stoat op 'n bok, zo as ze det neumt. Zonnen kleanen veerkaante meter met een hekwoark der umhen um der nit of te valn. Mear doar hef Pieter Jan nit genog an. Hee bestrik zo'n beetje het halve podium.
Hee dirigeert dan ook met de hele hoed, met haande en beene, met zinne dikke worstvingers, oogne en duur het van leenks noar rechts wappern van zinnen smoesterigen preakjas. Hee spreenk, hee steet, hej spiejt nog net nit, mear vearders is het netuurlijk en ene show woer met hee het koor en het orkest maximaal tot zin rech lot komn. Zo as ik al zea, commercieel is PJ wal. In de pauze kö'j CD's kopen, mear ook ne komme koffie en disse moal zelfs 'n rood of wit wijntje, een gleaske prik en zelfs een half fleske beer!! He'j non ooit zo zoolt egetn. De ontroerende Mattheüs metbeleawn en dan in de pauze an de Heinekens.
Der zeent greanzen.
Gerard Voortman