Principe van Herman
Herman Klein Velderman van D66 wil gin vuurzitter mear wean van de Commissie Grondgebied umdet de börgers nit mear mangt insprekken biej principe-besloeten. Zo neumt ze det op ´t gemeentehoes: at nen annemmer oarns wil bouwen, dan mut 'n gemeenteroad eerst oetsprekken det 'r in principe gin bezwoar is um op dee stea te bouwen. At 'r wál bezwoar zeent, hoo'j dan gin kösten te maken vuur niks.
De börgers mochen aaltied dreks biej principe-besloeten bezwoaren oetsprekken in de Commissie Grondgebied. Doar hef een gemeenteroad non nen streep duur-ezat. De wieze kearls en vrouwleu zeaden: "Noa het principeverzeuk zeent 'r nog genóg momeanten vuur de börgers bezwoar te maken." Um gin poar keer achter mekoar dezelfde bezwoaren te heuren, hef ne roadsmeerderheaid beslötten um biej principe-besloeten gin börgers an het woord te loaten. Doar was Herman Klein Velderman het volstrekt nit met eens en doarumme wil hee gin vuurzitter mear wean van de Commissie. Zo har'e det ook in de kraante loaten zetten en hee hef non edoan wat'e beloawd hef. Iej hebt 'n principe of iej hebt 't nit. Det mu'k um noageewn.
Ik kan van de roadsleden en commissieleden good begriepen det ze nit onneurig lange vergadern weelt, mer det mu'j dan wal op ne aandere manere oplössen en nit duur het votstrepen van de burgerinspraak. Herman hef gewoon geliek. Want, woerumme zo'j de inspraakmomeanten nit terugge-brengen tot éne geleagenheaid. A'j veendt da'j elke keer hetzelfde heurt, kan det ook wal in één keer. Woerumme zolle viej nit ook nog ofsprekken det börgers in het vervolg allene bezwoarn in köant denen in tweevoold: eerst in nen haandgeschreewnen breef in pearske blokletters en dan zoonder taalfouten oet-etypt in nen 12-puntsletter Bookman Old Style. Dan he'j 't ook dreks good op papier stoan. Skealt minstens dreekwart van alle bezwoaren.
Mer zoonder bak: burgerinspraak veune viej toch aaltied van groot belang. De politiek wol det geane. Kost tied! Joa wisse. Mer de börgers wolle viej toch met alle geweeld betrekken biej de politiek. Non hebbe viej oonze börgers joarenlaank zódöanig dresseerd det ze dreks metkuijert oawer alle plannen woer ze belang biej hebt. Mer ás ze det dan ook echt doot, dan zeg een road: "Huuw-huuw! Eerst viej as road en ieleu komt later."
Biej dee roadsvergadering dachen ik: wat is der non verkeerd an um zo gaauw meugelijk te weten woer de bezwoarn van de leu zit. A'j de bezwoarn weet, kö'j doar toch dreks reknge met hooldn...? Of zir ik non gek?
SGP-roadslid Sander Haase har der in elk geval een beunig ofschaffingsvuurstel vuur emaakt. Sander hef een skoon verstaand en har vergadertechnisch 100 proceant geliek. Hoaste alle roadsleden völlen as 'n blok. Mer het ofschaffen van inspraak begriept oonze inspraakgedresseerde börgers nit volgens miej. Det Herman Klein Velderman gin vuurzitter mear wil wean umdet hee wál vuur inspraak is; dét begriept de börgers heel good.
Disse keer hool ik het met Herman!
Gerrit Dannenberg