Stasi
A-j in Riessen ne wonning koopt, krig de gemeente doar vermoedelijk via het kadaster bod van en noa een poar moand krie-j ne oetgebreaide vroagenlieste woe-j echt vuur munn goan zitten.
Den breef begeent netuurlijk met: "Wij wensen u met deze aankoop heel goede jaren toe." Op zuk gemieg mu-j aaltied bedach wean. De gemeente verschuult zich vervolgens achter de wet WOZ mear ze weelt van alns weten. En det betekent meestieds nit völle goods.
Nen hoop gegewens hebt ze al in-evuld van adres tot an de perceelsgrötte tot an de kuubs van 'n keelder, de garage en van ' n biejbouw, mear dán begeent het.
Goa-je de wonning zelf gebroeken. Goa-j de groond dee at der umhen ligt ook zelf gebroeken. He-j de wonning via nen makelaar ekocht. Hoe lange hef de wonning te koop estoane. Wat he-j vuur de wonning betaald. Woennear he-j de wonning op naam ekregen. Wat was een doatum van de vuurlopige koopakte. Goa-j temet trouwen of hokken. Sloap iej op de zied of op de rugge. Wee hef het taxatierapport emaakt. Et iej leewer sloabonen, roobeten of zoerkool. Wat was het doel van het taxatierapport. Zi-j vuur of tegen de Brexit. Watvonne koarke goa-j hen. Wat was een doatum van het taxatierapport. Wat was de vrieje verkoopwearde in det taxatierapport. Dreenk iej Heinekens of toch lewer Grolsch. Halve lieters of piepkes. Watvonne luxe wage he-j. Hoe oold is den. Goa-j het hoes nog vertimmeren. He-j de wonning kocht van femilie. He-j de wonning eerst ehuurd. He-j het hoes op de veiling e-kocht. Zeent der bouwtechnische gebreken. Betaal iej het hoes 'zo' of he-j een groot bezwoar. He-j 'n hypotheek van de boerenleenbaanke of via crowdfunding en hoe völle.
Wat was 'n stoat van het dak. En 'n stoat van 'n geewel. Et iej lewer drupkes of ne peppermeunte. Wat was de stoat van de schure en van de plafonds. Betaaln iej ook nog goodwill vuur det hoes of kree-j badwill. Hoevölle tied zat der tusken de vuurlopige koopakte en 'n doatum de-j hoes op 'n naam kreengn. Woer zi-j de leste 8 joar op vakaantie hen ewest. Betaaln iej det zelf of he-j dee reaize ekregen. Is de wonning an-e wezen als Natuurschoonwet-landgoed op groond van de Natuurschoonwet 1928. Heb iej nog oarns tattoos. Wee geet het verbouwen van het hoes doon. Köj det zelf of schakel ie nen annemmer in. Doo-j dubbele roeten, glas-in lood of triple-glas. Watvuk stroatwoark doo-j temet um 't hoes hen. Pot iej alns vol met buxus. Zo joa, dan mu-j verdacht wean op de eikenprocessierups. Veend iej ook det de gemeente het oonderhoold van openboar greun verslatert. En wat goa-j doar an doon dan?
In de DDR tot 1989 hadden ze vuur al dit soort vroagen de Stasi. De gemeente Riessen begeent der al froai op te lieken.
Gerard Voortman