FAKE NEWS
Ik zeg et oe mer metene, ik wete et ook nit. De woarheid heb ik ook nit in pacht. Sommigen wal. Dee stoat metene met een bek as een skearmes kloar: zo mut et. Zo is et, en nit anders. Oh. Mer is dat wal zo? Heb iej dat wat vuur oe woarheid is, nit gewoon vuur emomd ekregen? Duur oewe möage, oew vaar en moor, de koarke, de media? "He'j et wè goed ezien?" zung Erwin Nyhoff al in prachtig Sallands.
As iej doar te depe oaver noadenkt — doar goa'j al, wo depe is TE depe? — kon et wal es slecht met oe oflopen. (En wat is slecht?) Denkt bievuurbeeld mer an den Duutsen filosoof Nietzsche. Den treuk zik ook regelmoatig de foekers in de plätte en zea: "Woarheden bestoat nit, enkel zichtspunten." Kö'j ook wier van zeggen: tja, dat is ook mer ne meaning. Mer Nietzsche drukken ze in et gesticht. Har den kearl et good wies kapot? Of was ziene woarheid te woar vuur de gewone wearld?
As twee junkens met ne göllippe binnenkomt noadat ze mekoar de köppe inhöwwen hebt, en iej vroagt van: wat is der gebuurd? Dan hank et der mer net vanof wee van de beide met een fidderig lipken et verhaal dut. As iej et den tweeden vroagt, kump der ne hele andere woarheid an et lecht. Wee ziene woarheid is dan wöarder?
Met halve woarheden weet iej nit mear wat iej mut geleuven. En dat is et non korrekt. Geleuven. Wiej kiezet (of loat ons vuurkuieren) wat ons et beste past. Klimaatverandering, Braziliaanske bosbranden, oorlog in et Midden-Oosten (is et volk doar non van zikzelf zo vervelend of reageert ze gewoon op joaren van toargerieje?).
As iej oargens ne meaning oaver hebt, zeuk iej net zo lange op internet töt iej iemand vindt den as etzelfde beweart. Alle tegenoaverestelden loat iej vuur et gemak eaven vort.
Wee et hardste skreeuwt hef geliek, lik de oavertuging op sociale media. Leu dee as et allemoal nit zo nauw weet, holdt zik stille. En vake zint dat non juust de klooksten. Nen zwieger oavertreft nen sprekker, zegt mien moo. Mer nen zwieger wördt ook nit eheurd.
Ik holde et vake op et midden. Ne gode Twentse egenskop. Iets is zo, töt iemand anders et tegendeel bewis. Of een betten van beide. Good is um te kieken wee as der better an wördt.
Van de andere kante wil nen bepoalden oetleg nit meteen zeggen dat de andere zeenswiezen nit ook woar zint. Volg iej et nog?
Loa'w et zo zeggen: Ieleu hebt allemoal geliek. Dus ik ook.