Engels in Twente
Der warren völle belangrieke leu: nen hoop wethoolders ook. Wethoolders köant gewoon oawerdag in de baas zin tied noar zon toerisme-symposium. Jammer genog hoaste gin roadsleden, terwiel juust oonze volksvertegenwoordigers een gezoond toeristenbeleid köant maken of brekken.
Alle accenten kö'j heuren. Quirine ter Haar dee heur beste Goois: "Hajtelijk welkom op deze wondejmooie lokaasie waaj ze in het westen jaloejs op zijn." Doarnoa köm de Tamara Toering, as sprekstalmeaster, moarktleider van het Vechtdal zoonder één woord Vechtdals. Doarnoa warren der dree keynote-sprekkers. En ook hier was gin woord Fraans biej. Een eersten was professor Herman Konings, nen Vlaming. Een tweeden sprekker was Jeremy Smith oet Engelaand en het doarde meanske, Singer Jungersted, oet Denemarken. Een Vlaming was good te volgen, een Engelsman ook redelijk en het Deense meanske wol oons vuural loaten moarken det'e heel good Engels kon en röateln op nonchalante topsnelheaid.
Gedeputeerde Roy de Witte was ne lust vuur 't oor: mooi Hollaands met een hearlijk Twents accent. Hee zea oawer 't algemeen meender te wiln teuten en mear wiln doon. Allene zó kö'j vuurkommen det de leu noar het Malieveeld goat. Hee wol de leu zeen, met de leu kuijern en combinaties maken. En heel plezerig: hee lulden nit verdan toen hee niks mear te vertellen had. En doar hoolde viej van in Tweante.
Wal vreug ik miej of: arre viej Oaweriessel an de man weelt brengen, mu'w det dan nit loaten doon duur de leu oet Oaweriessel zelf. Fealijk zollen doar de keynote-sprekkers vandan mutten kommen. Het makkelijkste is um dan te zeuken oonder de leu dee mooi plat doot. Zéé sprekt de taal van de leu dee wont in Oaweriessel. En loat ze de keynote-speech vuural doon in het plat. A'w det köant volgen in 't Engels en Vlaams, woerumme dan nit in het Tweants of het Sallaands? Ik wee zeker det 'r nóg mear van oawerkeump as ofgelopen doonderdag.
Gerrit Dannenberg