Poeierhenkie
Noadat de moarkt vuur cosmetische anpassingen van het vrouwenlichaam zo heanig an verzadigd is, wordt het hoge tied det 'r andacht vuur dee oarme bleute van kearls koomp.
Loopt vuur de oardigheaid is ne willekurige parfummeriezake binnen en iej zeent dat de skapruumte vuur 'de hedendaagse man' alverdan grötter wordt. Echte kearls zengt doar nit te kommen, mear de kearls dee at de hang hebt noar greutsigheaid des te mear. En ze skaamt zik der ook nit mear vuur um vuur eurzelf een lekker geurtje of specialen shampoo volgens het leste recept te kopen, loat stoan hoarlak, neagelschearks, hoarnetjes en zuk soort sitzenkroam. Met alle respect is dit allemoal tientjeswoark.
Het échte woark zee-j vuural biej kearls dee at 'n binnenbaand der duur kriengt en zik mear en mear onzeker veult umdet de hoargreanze alverdan achteroet geet, letterlijk en figuurlijk. Googelt vuur de oardigheaid is op 'haartransplantatie' en de wearlnd geet vuur oe lös.
Abudullah biej oons op de zaak had in minne oogne ne weelderigen hoardos mear doar mos toch neurig wat an gebuurn. Hee meelden een poar dage verlof en vleug op Istanbul an, want doar zatten de échte specialisten en vuur nog gin doezend euro, kree'j oew vertrouwen wierumme. Hee verteeln det in eure traditie het onbestoanboar was det nen kearl ginnen board had. Ook doarvuur steunen ze in de riegel. Oonder plaatselijke verdowing trekt ze oew dan hoar oet het achterheuwd det vervolgens wier in 'n kin wordt inplanteert. Ik geleuwen het nit, mear hee leut miej hele natuurgetrouwe plaatjes zeen. Vandoar det ál dee kearls van genne kaante grote böare hebt.
Noa krap veerteen dage zagge viej Abullah wier. Het heuwd kets e-milllimeterd, allemoal körstjes der op, mear doar moch hee ondaanks de jökkerieje, absoluut nit ankommen. Een poar dage in nen ligstool met het heuwd vriej, heuren der allemoal biej. Een meanske mut der wat vuur oawer hebben um good vuur 'n dag te kommen. Mear earlke is earlke, Abdullah krig wier nen mooin toef en doar gung het hum ook umme.
Geewt mear eens ach hoe völle kearls ineens wier völle mear hoar hebt. A'j dus froai op oew oeterlijk esteeld zeent, book iej ne vleegreaize noar Istanbul en doo-j wier met.
Ik heb Henk Hodes alias Poeiehenkie oet Riessen nooit ekeand. Dokter Slofstra skrif in 'Woer ziej van' det Poeierhenkie 'erg op zijn uiterlijk gesteld was'.
Ik kan oe wal vertellen det Poeierhenkie zinnen tied vear vuur oet was.
Gerard Voortman