Tesla
Het kan hard goan. Een poar joar geleden introduceren Hyundai ene van de eerste elektrische luxe waangs van dee tied. Oerlellijke bäkke, vuural weg-elegd vuur de geitenwollen-sokkenleu dee at um het milieu gaffen.
Al snel kömmen der ook hybride waangs op de moarkt zo as de Volvo V60, hardstekke deur en vuural vuur de leu dee at van de fiscale biejtelling konnen profiteren want det was te verwoarlozen.
Mitsibushi köm ook met zonnen loodzwoaren bak an, ook allenig edrewen vuur belastingvuurdelen en ze racen oe vuurbiej op de snelweg. Had dus niks met het milieu te maken.
Tesla is wat dét betref een heel biejzeunder geval. Loat wean wat wil, o'j ze mooi veendt of nit, den Elon Musk oet Amerika löt de bestoande autofabrikaanten dee al joaren in de business zit, leenks en rechts liggen en breg in korte tied hele mooie waangs op de moarkt. Zinne manere van zaakndoon is biejzeunder en lik op Henry Ford oet de joaren neengteenhoonderd.
Musk hef good ekekken hoe at Ford det dee. Biej Ford kö'j vuur 't gemak kiezen oet dree kluurn: zwart, zwart of zwart. Biej Tesla hoaste netzelfde. Wit is de standaardkluur, nen zwarten kost een tientje in de moand, mear gries ook en dan hooldt het op.
Opties zo as nen asbak, steurbekrachtiging, ne radio, verstelboare steule, mistlaampen of een rechterboetnspegel keant Tesla nit. Alns zit der op, vearder niks gin niejs, iej hoowt niks want der is al wier ne boot met 3000 model 3 oonderweg noar Hollaand.
A'j zonne wage besteeld hebt, kö'j via track en trace volgen woer de boot is en dan krie'j bericht de'j 'n auto in Tilburg köant ophalen. Doar blik het zwart van 't volk en dan geet det ongeveur als volgt.
'Jansen?, ok, u heeft een long range, hier de sleutel, uw auto staat op de 17e rij, nummer 113, veel plezier ermee'. Ginne bos blomen, gin instructiebeukn, kets niks. Een accu half vol, gauw vot hier want viej zeent steal drok.
Long range. Een helen dag geet het non biej oons op de zaak oawer elektrisch auto's, benaamd oawer Tesla's. Tot vuur kort gung het op verjoardage oawer hoe völle cylinders, hoe völle cc, watvukken motor-öllie, watvukke bougies, startmotor, ölliepealstok oewne wage hef. Det is allemoal vuurbiej.
Iej köant oe non oonderscheaiden duur te zeggen de'j ne 'long range' hebt, den at minstens 600 kilometer vear kan op ene batteriej, de weend met, nit al te völle bagage en nit härder as 95. Het basismodel met nen wichter-accu kan bedudend meender op enen accu.
Good onthoolden: a'j kiest vuur nen long range, doo-j met.
Gerard Voortman