Bouwplannen
Zol et dan eandelik? Mag vuurzichtig de vlagge oet? Da’w et nog magt beleaven! He he, foi, dat wör toch tied, of neet dan?
- Ja wat, Matn?
Na, at den lelliken poest van de ING eandelik vort geet. Dee ofzichtelike keienkiste midden vuur ’n Skild. Ik snappe neet wo as ze der dat met hebt ehad in dee tied. Dat dee bouwplannen op toafel kömmen en iederene mekoar op de skolders densden van ‘fantastisch! Wat een mooi niej gebouw. Stúk-ken better as dee olde broake van et Bondshotel. Dat geet duur!’
Denne wat dat ebouwd hef magt ze subiet de vergunnige intrekken. As ze oe vuur zowat vroagt zo’j toch op de stea weigeren? Al deden ze der oe vuur dree joar gratis waspoeier bie. Zo goodkoop lik et in ieder geval wal.
Mer zo heanig an begint de leu der wier in te geleuven. En dat wil wat zeggen in Riessen. De bolterkeikes zint al prachtig, Frans van Garrat temet een steilniej pand, den stapel betonnene bamiskieven wat nen fontein mos wean is duur ’n puunbrekker en non hef eandelik de ING de meeste earpel wal egetten.
Mer wat mut der vuur wierkommen? De meeste Riessenders griept metene wierumme noar wat der earder stund. Bondshotel en Skildskole. Is wat vuur te zeggen. Mer dat ducht mie wat van um en noabie de leste honderdvieftig joar. Terwiel at Riessen ne Hanzestad is. Zelfs in een gat as Doezeboarg loatt ze dat nog zeen. Woerumme goat dee welstandsleu neet es op Hanzetour vuur wat verske gedachten? Kampen, Zwolle, Deaventer… Of goat es bie et Middenplein in Enter an, vuur et hallenhoesgeveul. Ook al zo’n mooi spul.
Woerumme wier precies etzelfde? Et mag best wal es wat grötter. Riessen is wal eens zo groot as vuur vieftig joar terugge. De Sassenpoorte van Zwolle Of de Zoadmoarkt van Zutphen is natuurlik wat te gek, mer van de andere kante: denkt ook es an et volk wat dat zol trekken en de dikke knippe met centen dee ze bie zik hebt.
En a’w dan toch gangs zint: Pakt metene de rest van de betongevels in de winkelstroate an. Wilt de winkeliers dat neet, dan kriegt ze nen boom vuur de dure. Win-win: de lellikste gevels oet et zicht, Riessen mooi greun, ’n zommerdag lekker koel. Én et helpet wier met de CO2. Hooft Aanstoot ook ginne windmölle van 200 meter hoge bie zikzelf in ’n hof te zetten. Kom iej doar mooi onderoet, Jan!
In ieder geval mooi at et gangs geet. En as et wier zo’n keukelspil wördt, knuppe wiej Buffelbert an de hekken, net as bie de Koejans.