IKROEKOE
In Amsterdam zeent d’r plannen um een geur-museum op te starten. Zol dat non nit wat vuur het Riessens Museum wean? Viej hebt hier gin behoefte aan de loch van nen grachtengordel of de staank van de A 10, het geet hier um regionale loch. En dan ech museaal: zoas het vroger was. Kö’j het verschil roeken tusken Riessender, Nijverdallers en Eantersen? A’j in de koarke zatten, met leenks van oe nen boer met nen duurdringenden oolderwetse loch van persvoor in ’t buis en an de rechterhaand een vrouwmeanske met nen zakdook vol kolonnie, ha’j ’n neuze vol.
En dan dee oolderwetse loch biej oew gropmoo, van oetgebakken spek, skröamkes dus, en de loch van een pitrölliestel met ne panne vol stoafpearen.
Of nemt dee oolderwetse boerderiejen, woer dan ne boer biej de gierpoompe ’n kettel har vol epoompt . A’j gelukke harren steun d’r nen vleerbos in vollen blöai of kamperfoelie. De kroederige loch van heui roek iej noarns mear en dan gung iej via de delle met de beeste en de bingn noar de wonkökken woer de boerin net pannenkoke steun te bakken of wat vroger in de moarn vaske koffie in de smorre.
In ne bakkerieje hung d’r ne aandere loch as biej de slagerieje, of biej ’n schoonmaker met dee lekkere liemloch of biej ’n fietsenmaker woer het reuk noar solutie, um nen baand te plakken. En as nen smid een peard besleu…
An ’t eane van ’t joar ha’j wier ne aandere loch. Hoes an hoes was doar dee zwoare, weeïge loch van ölliekrappen, leaden ze te sputteren in de hete öllie . Gelukkig ha’j dan ook töafelkesoawnd, met de loch van rojen boeskool, of stoafpearen en vleajs in soorten. En as d’r deftig volk oawer de vloere köm, kree’j te maken met de loch van Peli-boenwas, en de keals steuken dan ne segoare an. En noa de visite ha’j de loch van jeneawer en braandewien.
Het Riessens Museum zol elken dag ne aandere loch können loaten roeken.
En dan eenmoal in het joar ne braandloch. Van nen barbecue, van een lös veur, van törf of van kollen of van red-cederhoolt, en dat d’r dan nen gecontroleerden braand uitbreuk. Kiek, noarns he'j de brandweer dichterbiej um te blussen en dan he’j awier ne aandere loch.
Disse museumsuggestie is gratis. As daank vuur de möaite wol ik geane iets van vleajs in de panne, of dat non carbonade of zoervleajs of nen gebroaden wos wordt: het zal miej wos wean.
Ammoale nog geluksallenjoar, en stekt de neuze in de weend. Ook dat kan lekker roeken. En a’k oe dan tegenkomme: ikroekoe!
Gerrit Kraa