Ideale klaante
Met cabaretiers en komieken heb ik duur’n regel nit zo völle. Vake maakt ze bak oawer de rugge van ’n aander, zeent ze grof in ’n moond of nóg slimmer en köant vake nit good hebm det leu eur nit dreks begriept en nit op uur en tied klapt.
Een Vlaamsen Arnout van den Bossche is ne oetzeundering. In een mooi sappig Vlaams kuijert hee oe zo een uur vot met rake dinge dee at alleman dagelijks metmaakt op schole, op ’t woark, met ambtenaarn. Disse moal geet het oawer ‘n ideale klaante’. A’j doar ne goo focus op hebt, doo-j mét.
Van den Bossche:
‘Oewne ideale klaante? Dat is marketing leu, doar kö’j dan dree joar vuur duurlearn of dree minuutn lustern. Teken een azzenkruiz (eawn good lustern hoe mooi at hee det zeg) met veer quadranten, en dan boawn an ’n verticalen as- veel geeld en oonder an, weainig geeld en op een horizontalen as leenks domme leu en rechts kloke leu. Roa, roa, woer zit oewen ideale doelgroep. Zó meulijk is marketing beste leu. Rechts boawn in: kloke leu met völle geeld. Nit an beginnen, det zeent benaamd kortingjagers, ze zeent nit vuur niks rieke worden. Ofbliewn.
Dan rechts oonder het azzenkruuz, kloke leu met weainig geeld. Det zeent leu dee at heel interessant koant kuieren, vake hele angename leu, mear iej koant der gin kwartje an winnen. Het type leraars zeg mear. Aaltied alns better weten, mear ne löage knippe. Nit an beginnen, gewoon tied verknooin.
Dan leenks oonder in, domme leu, zoonder geeld. Het verkopen geet heel vlot, mear ze maakt het product vake kapot, de gebroeksanwiezing least ze nit, het dinge dut nit. Aaltied elleande. Nit an beginnen, iej loopt der op löag, aaltied kösten en klachen achter of.
Ja, en dan maj het roaden. Leenks boawn in, domme leu met völle geeld. Dee stapt noar de baanke hen met een good plan, ne businesscase zengt ze vandage an ’n dag, en vroangt of de baanke eur ne vette financiering wil verstrekken vuur het plan. Een baankearl vrög vervolgens, wee at ze as doelgroep zeent vuur det lucratieve plan. En dan flustert den projectontwikkelaar heel zachtjes ‘domme leu met ne dikke knippe’. Mear det is toch nit serieus ? ‘
‘Maar det is óónze doelgroep, dat zeent óónze klaanten.
Gerard Voortman