Holleeder
In verbaand met corona dit joar nit op vakaantie noar Kuala Lumpur, Sardinië of waandelen in de Schotse hooglanden, mear een poar dagen hier en een poar dagen doar. Viej hadden de eerste wekke een hotelletje boekt in Alkmaar. Het was wal een biejzeunder hotel want het was ne umgebouwde gevangenis. Ne mannen-gevangenis vuur langdurig verblief en nog stammend oet de tied det der nog allenig mear kearls en vrouwleu warren. Muj rechtevoort van kuijeren !
Den projectontwikkelaar had met het ummebouwen nen hoop pech ehad want ze hadden last van optrekkend vocht. Het behang völ vanzelf van de mure, pleenten treuken krom en duren gungen klemmen. En ze gungen lös in het begin van de coronatied. Non jea, dan wee-j het wal, de mos geeld biej en iej konnen het ook wal zeen, het was nét nit helemoals of, mear wál biejzeunder. Viej deden ook met de rondleiding duur vuurmalige cipiers met. Der konnen 80 man in en de meesten zatten der nit vaste um zweetveute. Der zatten ook nit de minsten zoas de Molukse treinkapers oet de joaren '70, der zat de beroepscrimineel Stanley H. en nit te vergetten Willem Holleeder.
Mensweardig regime van wijlen Joop den Uyl
De beveiliging was, zeker achter of bekekken, nit optimaal, mear dat hadden ze an wijlen premier Joop den Uyl te daanken den at een mensweardige regime wol en der mos mear noadruk liggen op mogelijke terugkeer noar de gewone maatschappij. Non jea, möage as Stanley H. wussen met det milde klimaat wal road. Hee ontsnappen um duur zich roazendsnel tussen twee hoaks op mekoar stoande muren noar boawn hen te wosselen, en van het dak of te springen. Doot het um eens noa, ik komme nog ginnen halven meter.
Een moal in de moand mochen de crimineeln in nen ofgeslötten ruumte met allenig 2 steule, ne toafel en een berre kontakt hebben met eure vrouwe of vriendin. Vuur een good gesprek zeg mear. Vake wörn der dan ook harddrugs binnen e-brach. Hoe at ze het deden- roar roa Bosjager. Want noa het ‘kontaktmomentje’ mossen zik biej de ‘visitatiemeester’ stoomp oettrekken en noakekken – tot in alle lichaamsholtes, op het binnenbrengen van woapens, skoarpe dinge en drugs. Der veunden ze zowat nooit wat mear iej konnen dee drugs dreks roeken aj aower de gänge leupn. En dee möage moj dan vuural in de gaten hooln want dee konden zo mear flippen.
Het was ook de tied det ze ook nen tellevisie op de kamer mochen hebben. Det was mooi woark, de meesten hadden der wal ene van 't hoes oawer en wörden in-bracht. Hoe mooi um de waand eawn lös te dreejn um doar woapens of drugs in te verstoppen. Later wörden der van Rijkswege TV’s verstrekt, mear det kosten dan een poar euro in de moand.
Toch wal gek da'w in het restaurant van The Fallon hotel e-getten hebt met leppel den at Holleeder of Stanley H. ook in ’n moond hef e-had.
Gerard Voortman