Platte column: Terreur
AlgemeenWiej mut de klimaatdoelen halen! Leu, wiej mut de klimaatdoelen halen! Mer dee blaadjes op de stroate, kearl, dat kan toch echt neet! Dus, alloh boys, trek an dee joesterpiepe. Dat ’n benzine rechtevoord twee euro de liter kostet, niks met te maken. Too, töater op met den loeiwoei.
Ik stellen mie al helemoal de briefing vuur, oargens in nen skoftkeet met witte plastic kartunnene koffiebekers:
“Jongs let op: ‘n helen dag goa ieleu dat blad van de ene kante van de stroate noar de andere kante van de stroate poesten, steil tegen de wind in. En as der wier niej blad valt — der zit ja nog nen helen hoop van den pröttel in de beume! — NA DAN POEST IELEU DAT OOK VORD! BEGREPPEN?”
- Oui patron, joa baas!
En doar gungen de boys van de Vrij & Blij. Midden in Riessen, onder dee riege met dikke beume. En wiej weett at de gemeente nen gloepensen hekel hef an beume. Zeker as ze richting monumentale leaftied goat, want dan ma’j der NIKS mear met. Mer ja, zo mer dale hauwen kö’j ze ook neet, want dan kump de krante. En wiej mut de klimaatdoelen halen. Neet de krante.
Ha’w noe mer dee windmöllen ehad, doar kump tenminsten gin blad of. Hooft de gemeentekearls ook neet ’n helen dag duur de stroate te goan joesteren en kannenvol mengsmearing versleuteren.
Met nen dens en een zoer gezichte treuk ik de vuurdure achter mie to. Doar ha’j der net ene. Oordöppe op (hee wal), een knaloranje hesjen an en grote boten van skone an. En zonnen blearbessem op de rugge met nen groten slurf um de hoed eslingerd. Hee poesten et blad vuur de olde buurvrouwe öaren pad vord. Zo bie ne andere olde vrouwe um ’n auto en um de bene. Mer good, et lea der kant bie. En hee keek der ook onwies gelukkig bie. Hee har tenminsten eare van zien woark, want iej zaggen onmiddellik verskil. Ik gunnen et em ook nog. Hee deed ook mer wat em verteld was.
Onderwiel zoemen mie zonder eande et kabaal duur ’n kop. Et sonore, neet-ofloatende gebrom was as de drone, ’n ondertoon van de uilleann pipes, de keuniginne onder de doedelzakken. C-kruus, net ginnen D, heuren ik. Ik köm der van in Ierse sferen. Fluitende sprung ik op de fietse, oaver de gladepoeste keikes. The Humours of Ballyloughlin. Iej mut der mer wat van maken, of neet dan.
Martin ter Denge