Platte column: Karel en de verkiezingen
AlgemeenLoa’w het nog efkes oawer ‘menear Karel’ hebben, de titel woermet de bezeukers Karel van ’n Netoaris anspreuken. Dat gaf an dat-e nen toogankelijken kearl was – gewoon ‘Karel’ - en dat de bezeukers toch ook respect vuur um harn, ‘menear’, iets ofstaandelijks én iets noaberachtigs. Hee woonden in ’t veald, een heanig paradies.
Noa zin dood ha’j gennen grafsteen met een sierlijk hekjen, zoas biej zin breur Belcampo, of ne grote vealdkeaie vlak doarnöast op ’t oale koarkhof, woer de naam van de va van de beaide jongs op steet. Mer de keukelkoare besteet nog, ze zeent gangs met de restauratie. En loa’w zinne woordenbeuker nit vergetten, in 1970 nog heel biezeunder, iej konden d’r twee kaanten met op: Nederlands -Twents en Twents - Nederlands, dat was nit het geval met de eardere Twentse woordenbeuker, zoas van Dijkhuis oet Boarne of Dinant Diekhoes oet Hoxeboargen. Ook steet d’r nog een eenvoudig optrekjen in het Riessense veald, joarenlaank zinne hoesstea.
Woer blif het standbeeld van Harm Agteresch, Stokkers en Tojn-Oarnd
En tot verbiestering van nen bessen plear leu zeent d’r now plannen um dat of te brekken um oarns aans nieje hoesplaatsen te verwezenlijken… In aandere plaatsen hebt ze mear waardering vuur leu dee van wezenlijk belang warn op cultureel gebied. Iej hebt in Boarn, Losser, Dennekaamp en Almelo ne stroate, verneumd noar Dingeldein. Iej hebt in Boarn het Dijkhuis, in Hellendoorn een fors beeld van Johanna van Buren, in Eanske ha’j het Van Deinse instituut, en in ’n Achterhook he’j nog W. Heuvel, met zin prachtige book Oud-Achterhoeks boerenleven, én ne complete boerderieje, ‘t “Lebbenbrugge -boerderijmuseum”, ‘n documentatiecentrum woer ze alns verzamelt um Heuvel in eare te hoolden. In Gelselaar steet het beeld van dree schrievers, Heuvel, Krebbers en Van der Lugt.
As dat heulten huuske vot mut, verplaatst het dan noar (bevuurbeeld) het Riessens Museum. Maakt doar dan een documentatiecentrum van met ‘n deftigen naam: mr. K. D. Schönfeld Wichershoes. Met een Madame Tussaud-beeld van Karel, zittend in zinnen seempelen oarmstool, achter de toafel met het seempele schriefmechientje van het Oost-Duutse moark ‘Erika’, woerop hee al dee Riessense wöare etypt hef, en vuurboeten de keukelkoare met dat stereo-dia-apparaat.
Rechtevoort zeent d’r nen hoop leu niks te passe met wat gebuurt ‘met U, zonder U, over U”. Niej industrieterrein tusken Senoa en Veeneslagen, Ypelo volpleampen met Almelose ‘deuzen’, oondergroondse pröttel van de NAM biej Rossum, gebrek an huze vuur het jonge volk, en zo verdan. In meart toch ees good oawerweagen wavukke leu viej in de Gemeenteroaden wilt hebben.
Gerrit Kraa