Platte column: Vosman
AlgemeenEn wíér geet der in Riessen ne stadsboerderieje vot. Nee, disse moal ginne broake woer at gin lak of smak an is en van vandage op moarn as een Beeltbakkersspil in mekoar vaalt. Nee, het geet um nen aktieven boer den at het meuilijk wordt e-maakt en woervan het bestoansrecht um zepe wordt e-hulpen.
Boer Vosman, een monumeant van ne boerderije op de meuiste stea van Riessen. Hee geet vot oet Riessen en verhuusd op n doer noar de Kippershoeksweg in Wierden.
Fietst vuur de oardigheaid is vanof ’n Strowsweg noar de niejbouwwieke in ’t Opbrook. Iej treft doar dé greune longe van Riessen. Beume, weaidens, ’n Oosterhof, Janus van Schouten, wier weaileande en dan opeens rechts ne mooie oolde boerderiej en nen modernen melkstal met doar nen boer. Nen boer den at vot wordt e-drok duur de gemeente dee at mear alverdan weelt oetbreaiden en groondhonger hef. En jea, wat doo-j dan at Potje langs koomp en oew wál een mooi anbod dut. Juust, dan hap iej nen moal too.
Hoe mooi was het e-west det Vosman vuur het Opbrook nen zelfvuurzienenden boer was e-wörden en det mooie Riessense steakn zol oonderhoolden. Hee had doar een mooi kleainschalig zuivelfabriekje können maken, in de beende heulen duur leu, zo as ze det regtevoort zo mooi zengt, met ne afstand tot de arbeidsmarkt.
Deank iej non echt det Potje mooi roodboond melkvee op dee weaidens löt vretten. Tuurlijk nit. Hoogoet det Vosman der nog een poar peenken löt lopen mear vermoedelijk ook nit.
Potje hef det ook nit oet liefdadigheaid e-kocht. Begriepelijk. Potje wil doar wat met. Tuurlijk, det is eur good recht. Vot met de oolde boerderieje van Vosman. Hoe völle riante bouwkavels kö’j doar wal nit van maken. En miskien bedeenk Potje dan ook wal det-e eindelijk non moal mag bouwen op den groten kavel tusken ’n Eanterweg, de Kasteellaan en ’n Strowsweg. Det zol netuurlijk gloepens jammer wean.
Ik heure de gemeente het al zeggen: “Het was niet langer tegen te houden en de erfgoedadviesraad horen we ook niet.”
Wíér nen boer vot oet Riessen.
Wat jammer wat jammer.
Gerard Voortman