Platte column: pech
AlgemeenVurige wekke woonsdag landene wiej van ne lekkere woarkvakantie op Tenerife wier in Duutsland. Wiej hadden onderweg nog wind in de rugge, dus zelfs een half uur earder as verwochet. Wiej kregen de tasken rap van ’n band en konnen subiet duur noar de parkeerplaatse. Bepakt, bezakt en met rättelende rolkoffers frunniken ik de autoslöttels oet de taske, drukken op et knöpken en… niks. Akku löag.
Doar stund he, onzen Slopel. Wiej konnen zelfs de tasken neet in ’n kofferbak kwiet, want de kleppe geet ook op ’t elektrisch. Nen 19-jöarigen Gelber Engel tukkern ons et halve Kreis Kleve rond met ’n auto achterop ’n Abschlepper.
Et kosten em nog kuiern um ne boote te vuurkommen wegens ungeeignetes ausfahren bie de lochthaven: met ’n auto achterop de vrachtwage duur de slagbeume is eigenlik as of iej twee wagens metnemt vuur de pries van ene en dat mag neet. Jaja, et blif Duutsland. Hee zatten et meaken of bie een hotel, hulp met tasken sleppen, deed de wagen ofladen bie nen monteur op ’n plas en veuren mie toen ook nog wierumme noar et hotel. ‘Ich krieg bestimmt vom Chef uffm Sack weil wir kein Taxiservice sind, aber ich kann euch nicht in diese Kälte stehen lassen. Ich habe mich damals beim ADAC angemeldet um Anderen zu helfen.’ Hee har mear wiesheid as den 69-jöarigen Rus, den zik op denzelfden oavend as een klein kind anstelden en een heel land in ellende dompeln.
A’j een betten tevölle op internet kieket (nooit doon, da’s neet gezond), geet et der voortan oaver wee as der skold an hef. De NAVO hef et edoane, want dee kömmen em al körter an de hoed en doar wördt he jachterig van! De Amerikanen, want dat zint grote stokkebazen! De EU, dee verskrikkelike EU, woerduur as ook de grötste tegenstanders zonder möaite op vakantie könt en der vuur etzelfde 4G-tarief as thoes op Twitter oaver könt klagen! Dee leu dee zelf öare kultuur oaverboord smiett terwiel as de EU zik hardmaakt vuur öare sproake.
Lank verhaal kort: Schlemieleke P in ‘t Kremlin hef et bejoad. Dudeliker kan ik et neet maken.Woer as ik nums van dee skreeuwers ooit oaver heure is wat der de leu in Oekraïne zelf van ducht. Volgens mie krie’w genog beelden van hellige leu, totaal ontredderde leu, bange leu. As een ander land zik oargens bie anslot, he’j dat mer te sloeken. Dan hoof iej dat land neet kapot te plearen.Et is te hoppen dat der in de wearld mear Gelbe Engeln opstoat en andere leu vuurdoot wat menskelikheid is.
Martin ter Denge