Platte column: over Gronings gas

9 april 2022, 11:45 Algemeen

In de doarde wekke van ‘n oorlog Rusland-Oekraïne leut miej nen collega een appje op zinne telefoon zeen, met doar de boskop det-e zo mear 30.000 euro van de oawerheaid kreeg.

Ik dachen det-e bak maken, mear ik heb het zelf ezene. Wat wil het geval. Hee woont milden in het aardbevingsgebied in Groningen. Nit det hee ne oolde broake van ’n hoes hef, mear gewoon umdet het kán. Det dit noarns op slöt, gef ook an det oonze oawerheaid ze nit mear alle 24 in een kratje hef. Hee mos der zelf ook wal um lachen, want an zin hoes mankeerden niks. Non jea, een poar bäste in het stucadoorswoark, vermoedelijk kreempskuurkes, net als oawerál.

Aj nen moal de geleagenheaid hebt um doar in det stille Groningen roond te fietsen en iej geewt good ach, dan stikt het doar van oolde huze. Dee warn ook zoonder dee eardbevingen al nen in mekoar e-zakt. In makelaarstaal: huze met völle authentieke elemeanten. Mear den collega van miej woont in een hoes van het joar 2000. Gin grote börsen in de muren, gin gliempkes tusken de stene en de keziens woer a’j nen doem in köant stekken. De skaa was te oawerzeen, mear wal 30.000 euro op de baankreknge. He’j het ooit zo zoolte egetten?

De’j dee aardbevingen serieus mun nemmen is zo kloar as een kleuntje. En det dit koomp umderre viej doar gas oet de groond haalt is ook heelder. En det dee leu ehulpen munn worden ook. Zelfs good ehulpen munn worden.

Viej hebt joaren zitten sloapen toen a’w zelf alverdan meender gas doar oet de Groningsen boam halen, en viej ofhaankelijk van Ruslaand zeent ewörden. En umdáw lös mun kommen van Ruslaand met het gas, mu’w zeen de’w det op ne fesoenlijke manere oet de groond haalt. Dee Groningers goat echt nit verhuzen. Dee leu mu’j ook roem compenseren en alleman den at éch schade hef. Én ne gratis woarmtepoompe as deukn vuur ’t bloden.

Mear de’j zo mear zo völle geeld kriengt umde’j in een bepoald postcodegebied wont en vuur een poar kreempskuurks, is toch wal alté. Kö’j wier zeen det de oawerheaid onverantwoord met geeld smit. Mear det is gin niejs. “Woer geet het van ‘t joar hen op vakaantie Dennis?” Hee kon nog nit good kiezen: ne cruise met het hele gezin of met nen camper duur Amerika.

Gerard Voortman