platte column: de aubade 2022
AlgemeenEn toen ha’w tóch wier ne aubade. In ’t Park. En allemoal wa’w der wier. Det was nen zet eleedn. Wilhelmina oonder leiding van Wout Ligterink maakten der – as van oolds - een gezellig feest van. Wat nen hoop volk op ’t grösveeld tusken ’t Parkgebouw en de Muziekteante. Vuurzitter Henk Bresser van de Oranjevereniging heul ne hele mooie openingstoespraak. Vuural de leankte van zinn speech kon alleman slim waardeern. De scouts hijsen plechtig de vlagn. Börgemeaster Arco Hofland wes disse keer voice-over, want gin mens zag um stoan tusken al det lange joonkvolk van rechtevoort. Mear het geluud was glasheelder en viej versteunn um prima. Ook de leu met een leentje warren der biej. En de wethoolders en de roadsleden.
En viej zungn wier met ’n aln het Twentse Volkslied. In ’t Hollaands natuurlijk. Want oons Tweanten kö’j nen hoop verwietn, mear nit de’w éénkennig zeent. Gemeentebelang-wethoolder Jan Aanstoot oet het Sallaandse Hoolten zung voloet met. Jammer toch det Jan der oetscheaidt. Vuur de fienpreuwers was der wier het volstrekt onbekeande Lied voor de Koning. Wee heel mooi kan zingen, kon zichzelf biej dit versje heel good heuren.
En toen gong het deksel der of, want viej deedn met ’n aln Oranje boven, leve de kohoning. Fortissimo!! En dreks doar achteran De blauw geruite kiel, van dichter Antoon de Rop, nen schoolmeaster oet Amsterdam. Het eerste en tweede couplet kan teegnswoordig nog net, want het doarde couplet - Daar staat Hollands admiraal/Nu een man van vuur en staal/De schri-hi-hik der zee – dörve viej nit mear an. Gelukkig, dee aandere foute versjes hebt ’t nog oawerleawd, zo as In naam van Oranje, met dee greutse regels oawer den wreedn Lumey van der Marck den “Den Briel of uw val vordert”. Kearl-gen-eane: det zeent nog eens foute teksten. En toen köm doar Piet Hein nog achteran. Doar he’w ne stroate noar eneumd, want hee hef de Spaanse zilvervloot in-epikt. De “Spaanse matten” zeent dan wal in-eruild vuur “Spaanse munten”, mear det moch de pret in ’t Park nit drukken.
En as aaltied sleute viej de aubade of met ’t Wilhelmus. Ook zon gloepens fout versje tooverdan. Geet jums oawer ’t eern van de Koning van Hispanje en Zwiege-Wilm den van Duitsen bloed was. En dan he’k het al geent oawer det tweede couplet. Wat fout, wat fout. Mear allemoal wa’w der wier. En wat he’w dit emist. En wat he’w der wier gloepens van genötn!
Tot tookn joar. Van miej hoof de Oranjevereniging allene ‘t joartal van ‘t programma an te passen.
Gerrit Dannenberg