Repaircafé
Zo heanig an begeent het besef duur te dringen da’w met ’n aln toch wal heel riant leawt. De leu begint te begriepen det het verknooien en vermatteln van weardevolle groondstoffen zo nit lenger kan. Woerumme zö’j ne nieje koffiemesiene kopen at der oarns een droäkn lös zit. Mear jea, woer goa’j der dan met hen? In Riessen zit bevuurbeeld ginne witgoed-zake mear. Dan mu’j noar Doornenbal op ’n Nijverdal, dee brengt oe dan onderzeukskösten in rekkening en dan kom iej der achter da’j vuur zeuwn tientjes better nen spleenterniejn köant kopen.
Het repaircafé zit jammer genog vot-estopt
Biej oons kö’w de stofzugerstange nit mear löskoppelen van de slange. Nit handig, mear ik krege het ook nit trechte hoe at det dan wál lös kon. Tot miej het repaircafé in de gedachten skeut.
Het repaircafé zit jammergenog vot-estopt an de achterkaande van de oolde Plus-supermarkt, det non een hukkespil is ewördn, mear oeteindelijk was ik der. Doar zatten wal 5 man noa te kieken en benaamd dröaks wier vaste soldeern. Gerrit van Jut köm biej miej oawer as de Chef-Intake. Ik lea hum het probleem oet. Hee oawerlea eawn en ze gungen der dreks met gangs. Ik kon ne komme koffie kriegen en keke miej de oogne oet wat doar allemoals gebuurt.
Mear ook ene met nen zeum oet de bokse en nen rits den nit wol metwoarkn
Oonderwiel köm doar in de gaauwigheaid zo 10 man binnen met – joawal een defect koffiezetapparaat, striekiezders, stofzugers, wasemkappen, nen mixer, een beeldscherm, ne tillevisie, nen elektrischen kokwekker en nóg wier ne koffiemesiene, nen Senseo. Mear ook ene met nen zeum oet de bokse en nen rits den at nit wol metwoarken. Der zatten een poar vrouwleu dee at met de neejmesiene den zeum der wier inmaken en den rits wier op ’t spoer kregen. Ik zagge Ewart Bosman, Henk Altena oet ’n Skrapert en toen köm Henk van de Tute binnen: volgens miej ook met een Senseootje. Henk is begunnen met witgoed an ’t Stroatje, later noar de Hoar nommer 100 en nóg wier later noar ’n Skeeld. Henk verteeln kort hoe het met zinne witgoodzake was of-elop en gaf miej nog wal nen tip a’k der met dee stofzugerslang nit oetkömme; biej Freie op ‘n Nijverdal verkochen ze imitatiespil, ook wal vuur particulieren: a’j mear betaalt.
At de gemeente de verduurzaming serieus neamp, zollen ze het repaircafé ne better stea munn gewen in ruil det ze elke wekke lös zeent. En dan miskien kieken of ze met vaste minimumtarieven köant woarken, want non hoo'j allenig nen vriejwillige bijdrage te doon.
De stofzugerslange dut wier en ik goa reclame maken vuur dee jongs!
Gerard Voortman