Vrijheid Blijheid
Daangs zit ik een helen dag in cieferkes te loeren en doarumme leek miej het good um eens ne moal ‘joa’ te zeggen tegen de cliëntenroad van een verzorgingstehoes. Het geet 'r doar umme het welzijn van de leu in de gaten te hoolden. Vanzelf kriej dan ook de ontwikkelingen met in de zorg en de oawereenkomst in wollig taalgebroek biej ne baanke en biej Maranatha.
Kortens ha'w ne biejeenkomst met het voltallige personeel woer at oons oet de deuker wörden edoan oawer de veraanderingen binnen de zorg. Doar plakt ze dan een mooi thema an ‘vrijheid en veiligheid’. Het geet der umme det 'r méár zorg op moat mut kommen, mear het mut gin Beeltbakkersspil worden. Het MT "wil met jullie aan de slag, samen moeten we bouwen aan een nieuwe aansturing. We hebben de eerste stappen gezet, het leiderschap komt nu dichtbij." (pagina 17, 2e alinea van het beukn management woltaal, iej kent det wal)
Nen zorgprofessor met 23 functies: aanjager, initiator, kartrekker en directeur-ad-interim
Ze hadden zorgprofessional Peter Hoekstra (52) oet-eneudigd. Wee-j wal: 23 functies ehad, van aanjager tot initiator en van kartrekker tot ad interim. Good wakker en good met de babbel. Mear wat hee zea was wal interessant. Der komt alverdan mear oolde leu dee at al dan nit met gebreken länger thoes bliewt en dan pas op ’t lesten noar een verzorgingscentrum goat. Vake dementeert ze al en iej weelt ook nit alleman an de Zweeds Band leggen. Nooit van eheurd (googelt zelf mear eawn), mear het is het vaste-knuppen van onröstige leu op ’t berre.
Op dit momeant geet het zo: het personeel smeart de leu de stoete, lengt de kleare trechte vuur moarn, goat op uur en tied oonder het ziejke en strak um 9 uur allemal noar berre hen. Want dán begeent de nachzuster Ria van Beneadske en zee is doar nit vuur. Zwoardere gevallen mun op de ofdeling bliewn. Weanig moatwoark dus. Viej mun völle bettere intakes doon en het mag ook goan um watvukke hobby’s der ene had, watvukke muziek veend iej mooi. En at der dan ene ’s naches wil knooien met ne figuurzage of um 11 uur nog wil biljarten of wil kuieren oawer Mozart en lustern noar Bacc of het Urker Mannenkoor, dan mut det können. Betrekt de leu biej het kiezen wat ze weelt etten en loat ze helpen met earpelen skellen. Koopt een poar spuitbussen van 1,98 stuk en maakt waandelroutes ook duur ’n binnentuin hen. Netuurlijk geet det mangs nen moal mis en brek der ene de huppe. Det is nit oewne verantwoordelijkheaid en hoe vake keump det non vuur. Wus iej wal det dementerende leu toch een ingebakken alarm hebt en ze nit zo mear in nen viewer loopt. Viej mun óf van ‘mail to everone’ en zoo doo'w det hier noar in het gesprek goan met de bewonners en miskien ook femilie.
Der zeent nog 33 vacatures.
Gerard Voortman