Kiwwe
Hop, nen Malteser der in en moalen mear. Wiej stoat der neet bie stille, mer de oefening wa’j et vaakst doot is toch wal et kauwen. Nen bol bie ’n köttel bie an bouwen, zol Dieks zeggen. Ikke nit, ik heb nog wal wat fatsoen in de hoed. Zonne essentiële handeling vuur et leavensbehold, zo weinig instructie. Of vuurlichting. Iej wordt der gewoon met in et depe smetten. Hier he’j nen telder met etten, zeukt et mer oet! En neet slatern!
o’j de neageln wal of neet mut knippen, platjeboars of met dikke zollen, allens hebt ze oetepluusd
Nee dan hardlopen. O’j et beste op ’n tip van ’n tee köant landen of juust op de hakke, wo’j de ideale bane van hakke noar teen köant maken, o’j de neageln wal of neet mut knippen, platjeboars of met dikke zollen, allens hebt ze oetepluusd. Skaatsen? Depe zitten, net o’j mut drieten op ne Franske camping. Wal zovölle informatie da’j der net as bie et kauwen gewoon neet mear oet wies wordt.
a’j te völle slikkerieje kauwt krie’j wier nen dikkerdendenden kop
O’j et beste hard köant bieten, of zachte, o’j recht op en dale mut of toch mear ne cirkulaire sikkenmoaling. (O’j der ook zo doenöardig bie mut kieken ma’j zelf weten.) En mu’j dan nen helen hoop in een keer in ’n mond stekken of toch mer ne kleine tandtoargerieje? Wo vake kauwen vuur a’j sloeket? En is dat dan ofhankelik van o’j ne vette kabbenade zitt te verbieten of nen baal met chips?
Is doar eagenlik wal onderzeuk noar edoan? Chomp and Chew for a Sexy Jawline, kauwt ons de India Times vuur. Dus a’j mear wippet met et kinneke krie’j mear spieren in de kiwwe en dat zut der dan strakker oet. Mer krie’j dan vuural völle andacht vanoet India? En is dat dan allene kearls of vrouwleu of albeale en allens der tuskenin? En wo lange mu’j dan trainen? En a’j te völle slikkerieje kauwt krie’j wier nen dikkerdendenden kop en gef dat wier opheffing van et effect. Wat is dan de ideale balans?
Lett der mer es op. Goat mer es in et restaurant zitten en kiekt es um oe hen. Et zol oe nog in et lachen sketen: “Haha, ieleu hebt gin idee woer’j met gangs zint.” Is gewoon zo. Mer de woarkelikheid is oarmood troef.
Feitelik is et ne skande at doar op de skolen gin andacht vuur is. Net as met bookholden en belastingkroam. De jeugnd zol vuurbereid de samenleaving inmutten. Mer doo'j dat dan bie Economie, Gemmestiek of Maatschappijleer?
Kauwt doar mer es een zetjen op.
Martin ter Denge