Column Kees Jansen : Better of zoonder religie

Better of zoonder religie

'Zoonder religie zo'w better of wean.' Det zeg Richard Dawkins, nen heeln bekeanden atheïst den 'n heeln hoop (en ook mooie) beuker eskreewen hef. Hee veendt det religie verantwoordelijk is vuur nen ommeunigen hoop kwoad en elleane in de wearld de'w 't mer better of konnen skaffen. Viej hebt religie ook heelmoals nit neurig. God is een verzinsel van leu en de wetenskop kan d'r niks met. Doarbiej, 't geleuwe brech oe bekreumpenheaid en maakt da'j geet nit vuur oezölf köant deanken. Nee, 't secularisme en materialisme zeent völ better. Doar he'j genog an. En 't lik miej det Dawkins, ook in oonze vaderlaandse elite froai völle anhangers hef. Ik heur geregeld dit soort geluuden op radio en de tellevisie, Arjen Lubach bevuurbeeld.
Wat mu'j inbrengen teeng 't verwiet da'j fealik 'n betjen achterlijk zeent a'j nog geleuwt? Of da'j in elk geval nit good hebt noa-dach oawer oezölf en de wearlnd? Zon kort collumpje dut nit heel völle netuulk. Doarumme 'n poar deankvroagen. Stelt oe vuur det d'r ene zol zegn: 'Viej zoln better of wean zoonder leefde.' Iederene kan toch zeen det leefde heel wat noarigheaid hef ebrach: haat, jaloersigheaid, obsessies en völ leed. Iej köant van de verkeerde dinge hoolden en van de verkeerde leu. Leefde kan oe zodöanig in 'n kop goan zitten da'j nit mear weet wa'j doot.
Ik deanke det de meeste leu hierop zoln zeggen det leefde - a'j 't op zikzelf bekiekt, zoonder de verveelnde dinge - heel belangriek is. Miskien wal 't grötste en 't belangriekste wa'w hebt. Iej munn allene learen um op de goo manere leef te hebben en met de juuste kiek op de dinge. Noh, det kö'j ook zeggen van religie. Netuulk kan religie leaiden tot oorlogen, mer is religie dan de oorzaak of ne manere woerduur as zee tot oetdrukking koomp? Religie kan oe dom maken of d'r vuur zorgen da'j alle contact met de werkelijkheaid verleest. (Mer jea, deanke viej det ook mangs nit van de wetenskop?)
En dan nog wat. A'w God wegredeneert oet oons universum, wat hoolde viej dan oawer? Wat hebt de dinge dee'w doot dan vuur zin? Viej zeent het product van bleend tooval. Viej leawt in enen groten doellozen chaos. En dood is dood. Viej zeent duur gin ene echt eweeld, wa'w doot hef gin eankel nut behalve wa'j d'r direct van moarkt. Onrecht is vervelend, mer d'r is niemand den doar echt op terugge kan kommen. Ik vroage miej of o'j det echt accepteren köant a'j 't bestoan van God weg-edach hebt oet oons universum. Het lik miej det atheïsten det zölf ook heel good weet. En dan he'k 't nog geet nit ehad oawer wat 2000 joar christendom oons an skoonheaid en cultuur hef op-eleawerd. Kearl, skeai oet; ik bliewe vuureerst nog wal eawen geleuwn.