Column Kraa : Vekaantieplannen

A'j de adverteanties in de kraanten wilt geleuwen, wordt het non al de heugste tied um noar 'n reaisburo te goan. Aans mis iej de vuurdeelanbiedingen! Bedeankt wal: d'r kan oe nen bessen plear dinge oawerkommen.

Nemt Mans, den noa ne fikse reagenbuje met matrasse en al oet de teante votdreef en het leste woar enömmen is in de richting van nen hogen waterval oarns biej Schaffhausen. Of Bats, gek op stokbrood, hee kawden ne goalden krone van nen koezen vot, in Fraankriek. Hee har ne duur esloekt, en mos de wach hoolden biej 'n oetgaank van zin lief. Mear…op dee camping ha'j zon hurktoilet, twee plaanken met 'n gat d'r tusken, dus doar köm nen emmer an te passe en zon Oldenbarnevelt-stöksken um te reuren.

Mientje har ne hangmatte, lea zik doarin verzaligd dale met nen mooien trilogie (Loesewies verliefd/verloofd/gescheiden), en net biej het leazen van het romantische leste chapiter scheut de karabijnsloeting lös en doar lea Mientje, krek met 't stuutje op zonne Zwitsere keaje, zengt nit dat dat nit zear dut. En doar hè-j Getjan: kreeg in Zeelaand ne mooie stea op ne camping, pal nöast nen sköttelbraaibakker, met gedurig nen dikken rookkolom op Getjan zin caravan op an. De rijdende rechter köm d'r an te passe, "ik eis dat ik een rookvrij carbonaadjen kan eten". De oetspraak völ geunstig oet, mear jea, dat was 14 deage later, en toen was de vekaantie krek vuurbiej.

Getheendrek zochen ne röstige camping met völle privacy. Hee veun zonne röstige stea, mear doar bleek wal dat de camping-gäste niks te völle klear anhadden, wat zeg ik: ze leupen doar in 't blote gat. Getheendrek kreeg zin Dientjen zo wied dat zee doar op 'n lessen ook oet de klear gung. Zo wö-j oaweral egaal broen. Allenig was het wal efkes ofzeen toen ze vanof het strand met 'n auto wierumme wollen jagen, dewiel 'n ketakslöttel vot was, met 'n reserveslöttel in 't dashboardkäsje en de weagenwach probeerden de dure lös te kriegen. Hee nöm d'r alle tied vuur um Dientjen oet te leggen woedäonig dat gung. Zee steun doar met de knene stief tegen mekaander met gestrekte oarms en gevoolden hane met 'n gezichte van hier heur ik nit biej.

En wat te deanken van Mans? Hee vergat det'e in Engelaand leenksumme oawer ne rotonde mos, dan kom iej froaj wat integen, Engelse auto's, bevuurbeeld, dee lewer van de aandere kaante komt. Een woonder dat that blody foreigner toch nog veailig verdan kon. Ik zal oeleu de rest van alle raampen bespoaren, aanders dörf ie nit eens lenger noar zo'n reajsburo te goan…. Doot dus heanig an met al dee vakaantieplannen en bezeent ear a'j begeent…

Gerrit Kraa