Column Martin Ter Deng: Drumfanfare Wilhelmina

As viefjöarig kearlken kreeg ik van minn Janeum vief LP's. Marsmuziek van de Johan Willem Frisokapel en nog een poar grootmachten mear. Minstens twee moal in de wekke lustern ik dee. Blaze Away, Stars & Stripes, Alte Kameraden, ik kon ze note vuur note metzingn. Oonderwiel ontdekn ik det a'j de hooktaandn zachte langs mekoar krast, et dan in n kop net kleenkt as de tromn op dee plaatn. Prachtig.
Op minn achtsten spöln ik nen zoaterdag op de stroate met mien breur, toen as et Muziek oawer n Diekjansweg köm. Wat harn ze deftige päkke. En ik keann alns wat ze spöln! Verdan gungn ze, töt bie de Mensink-boerderieje… Vie meugn alle instrumeantn oetprobeern! Ik greep natuurlik meteen ne tromme. Op n draf op hoes an. "Mamaaa, mogun wuh bij duh muziek?" Mien moo zea: "Wat zeg der oew vaa van?" Vanoet et hennhok vreug den: "Wat zeg der oew moo van?" Taandkrasn hoown doarnoa nit mear.
De eerste stökke sneuweln de eerste leswekke. n Toetn woerin as ik ze vervoorn, har een gat. Oonderweg -zjiets- glipn der ene zo tusken de speekn van de fietse. Met nen roodn kop verteeln ik et minn tromlearaar. Den teuweln lachend een niej stel oet zinne taske. Ik heul tromles töt minn 24sten. Et conservatorium loonkn.
Mien breur zinne muziekcarrière was noa zes wekn oawer. Den breuk beide oarmn bie et donderjaagn met ne crossfietse. Of ekekn van Amerikaanse Drum & Bugle Corpsen moderniseern de drumfanfare met popmuziek, showpäkke, meuiliker muziekstukn, lastiger loopfiguurn. Et harmonieorkest gung nit mear met oawer stroate. Zo onsteundn twee verenigingn oonder eenn naam. Begin van et eande? In 2005 wör de drumfanfare Kampioen bie et NK Show met nog zowat 40 man. In 2017 Kampioen CGN Winds, met nog mer 15 man. In 20 joar tied kan der nen hoop gebuurn. Nit genog anwas, de minder fanatiekn stopn, learlingen op eleidt töt stoolzitters in plaatse van stroatelopers, de oawerbliewers te fanatiek um der as niejkommer zo bie tusken te könn. Undsoweiter.
De oolde skapzangers warn et der oawer eens: et harmonieorkest zal et ook zwöarder kriegn. De jonge möage komt ja nit mer zomear op et muziek op of. Hebt al genog aandere dinge. Bie de leu duur de stroate mu'j. Oet de huze mu'j ze toetn. Net as toen.
Drumfanfare Wilhelmina, minne tweede familie. Wat ik doar wal nit van eleard hebbe: duurzetn, gin half woark, saamn der teegn an, oezelf vuurbie, dörven. Drumfanfare Wilhelmina, doar kö'j wal een book oawer skriewn. Misskien doo'k det nog es. Mer nog eerst twee optreadns en dan zeg ik as n ooldn Böks: "klaar."