Platte column over Knooidieks

Estoarkt duur miene oaverwinning um zelf ’n CV-kettel bie te vullen teug ik vanmorgen noar et skuurken. De bände van de fietse mos wier wat locht bie in. Zelfs et umslachtige Franske ventiel (alwier zonnen readen um nen hekel an Fransken te hebben) maakt mie ’n kachel neet an. Verloopstukke der op, klemme van de slange der umme, herree. Eerst et ene rad, tien moal pompen, terechte. Toen et andere. Negen moal en toen, plop, skeut de slange van de pompe lös. An et ventiel zat et dus nog aneklemd, mer ik stund inenen met ne lösse pompe zonder slange in de handen.

De slange was al ne vervanging, want ’n vurigen was verspocht. Um es sustainable te doon kochten ik mie ne moand of wat wierumme ne vervangende slange, dan hoof ik neet direks ne hele nieje fietspompe te halen. En ik zin natuurlik kearl, want ik had verleden wekke den kettel al bie evuld. Dan kan ik, machoman, zonne slange ook wal vervangen. Hoh, testosteron tot achter de oren.

eksten skrieven kan ik, mer wat he’j doar noe an? Ik mut kettels en fietsen en fietspompen können fixen. Fummelen en martelen en knooien. Mean iej a’k em der wier an kreeg?

Röstig blieven, Matn. Kanaliseert oewen zwoager. Den zeg aait: “As et neet past, make wiej et pas.” Good kieken. Ah, ik zee et al. Et plastik blok an de onderkante had net neet genog ruumte vuur et skroefstukke, vandoar dat he dus net ook lösskeut. Et had der gewoon nog nooit good opezetten en et is een wonder at dat nog neet earder gebuurd was. Stanleymes der bie, oetsnieden, ruumte maken. Hulp niks.

Et zat toch net ook? Woerumme noe neet? Met ne tange der bie vuur mear grip. Hulp neet. Et höltene treadplänken zat ook döanig in de weg vuur disse operatie. Dat der of ehaald. Zat et rubberen ringske in de weg? Et stanleymes der in! Niks hulp. En de klokke tikken voortan, want ik mos ook nog gewoon an et woark. Hellig smeet ik et apparaat in nen hook.

Op een online fietsenmakersforum zeaden ze: “Voor twintig euro heb je een mooie nieuwe pomp.” Toen heurden ik in gedachten mienen anderen zwoager, oetvoerder op ‘n bouw: “Wiej kriegnt nog een gebrek an domme leu.” Noah, zwoager, volgens mie he’w der een oaverskot van.

As vergelding skrief ik der dus mer nen kneiterstrakken kolumn oaver. En morgen koop ik de deurste nieje fietspompe wa’k kan vinden. Dat kan ik betalen umdat ik zonnen geweldigen kolumnskriever zin. Ooh!

Martin ter Denge