Gerard Voortman

Sportskole

Sinds een joar of wat kom ik geregeld biej Artros. Artros in 'n Mos is ne fitnessorganisatie, sportskole, zweetruumte of hoe-j det ook neumen weelt. Mear nit allenig dét, ze köant oe ook merakels masseren.

Biej Artros zee'j gin plakplaatjesvolk, der is gin muziek, gin lewoai, gin gedoo, niks van det alns. Der stoat good 100 apparaten woer a'j oe köant oetleawn en biej de meeste leu gleamp het vel van 't zweet en löp het met ströalkes langs de kennebakken. Dikke haanddeuke um 'n nekke hen um het zweet op te nemmen en vanzelf hef alleman een fleske met kraanwater biej de haande.
Iej zeet dikke leu, magere leu, héle dikke leu, hele magere leu, sportieve leu met ingewikkelde trainingspäkke, gewone leu met normale klear an, joonk volk, euldere leu. Iej zeet Jan met de pette en Quote 500- volk en alns wat doar tusken zit. Allemoal nöast mekoar lopen, denzen en marteln op de verskilnde loopbeane um wille van de gezoondheaid en um nit al te dikke te worden. Niks mis met.

Kortens hebt de eigenaren, Peter en Lian, froai investeerd. Tot vuur kort kö'j oe oetleawn op van dee degelijke Amerikaanse loopbeande met as type-anduding: treadmill. Treamölle dus. Stewige apparaten van dik stoal ofkomstig van ofgedaankte baileybruggen oet 'n oorlog, dikke lasnöa en een bedieningspaneel met ne haandevol programma's van heanig-an-beginnen en dan alverdan härder, of vlak-beginnen en dan verdan stealer en iej köant met wat zelfs noar dealten hen lopen. Der zat ne tiedklokke op, nen hartslagmeter en nen calorieënteller.
Der stoat non nieje aparaten: Panattas, made in Italië. Non jea, dan wee'j het wal. Het zut der gelikt oet mear het mist de degelijke oetstroaling van ne Baileybrugge. Het knippert, het piept, het gleamp en het dut van alns, mear der zit gin programma's op met heel völle variaties.
En nóg slimmer is det dee apparaten meender calorieën opgeewt. Dachen ik aaltied de'k op dee Baileybruggen het ge-et van 'n helen dag good kon maken; ik komme non zo'n betjen tot dree-kwart. En det is heel zoer.
'Ja,' zengt ze dan, 'je weet natuurlijk niet welk apparaat gelijk heeft.' Nee, det weet ik ook wal, mear het gef een better geveul a'j 600 calorieën in 'n uur biej-höaket of det'e biej dee oarmzalige 400 blif stekken.
Nee, dan heb ik toch lewer Amerikaanse apparaten as dee niejmoodse Italianen.

Gerard Voortman