Column: Wachtweure

Wachtweure zeent de slöttels tot oew privé-leawen. Toch roar da'w doar zo slordig met ummegoat. 'n Poar dinge zeent belangriek um oew wachtweure veailig te maken:

1. Ze munnen nit te roaden wean duur nen klookn hacker of duur supersnelle software.
2. Gebroek nooit hetzölfde wachtwoord vuur verschillende diensten, want at ene van dee sites wordt ehackt, he'j 'n probleem.
3. A'j oe an disse vuurwaarden weelt hooldn, mu'j heel völle meuilijke wachtweure onthooldn.

Det is nit te doon. A'k 'n veailig wachtwoord kan bedeanken is dat zo klook van miejzelf de'k um biej de voolgende keer inloggen nit mear wete. Gistern hak wier 'n probleem met 'n wachtwoord.

Ik hebbe nen gleunigen hekel an 't declareren van onkösten. Ik make de bonnetjes vot, ik vergette het of ik vene 't gewoon te völle möaite um terugge te vroagen. Viej woarkt op schole met 't programma YouForce. Met 'viej' bedool ik vuural de administratie of 't personeelsmanagement, want viej, de leraren, köant nit met det programma woarken. 't Programma is expres zo ingewikkeld emaakt, dat 'r zelfs gin ene mear an begeent um wat te declareren.

Non har ik miej lest in eschreewn vuur ne cursus. Dee zeent zo verrekte deur da'j 't bedrag wal múnn declareren, waant aans he'j ne wekke vuur niks ewoarkt. Dus ik startten YouForce op, mer ik kömme der nit in. Ik har alle wachtweure dee ik mer kon bedeanken oetprebeerd, toew ik gek in de kop op de knop 'wachtwoord vergeten' drokken.

Een half uur later kreeg ik ne mail van 'n systeembeheerder zelf met 'uw wachtwoord is: drietebulen'. Alle kluren vleugen miej um 'n kop. Ineens wus ik 't wier. Ik har één keer earder YouForce op-estart. Ik wazze biej de administratie ewes um de boskoppen vuur ne vergadering te declareren, mer ze wollen miej nit helpen: "Declareren geet tegenwoordig via YouForce." Ik wazze zó hellig op al dee drietebulen dee dit unmeugelijke programma bedacht harren. Met dit wachtwoord ha'k ze toch nog mooi te pakken.

Marieke Dannenberg