<SCRIPT SRC="//secure.adnxs.com/ttj?id=10195025&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>

Boomka(m)p

Nog eaven oaver beume. Vanear parkeerden ik bie de Rabobanke, want wiej mossen nog wat bodskoppen halen. Oaver de half-Aziatische verkeerschaos bie de Jumbo zal ik zwiegen. Op 'n hook van de Boomkamp en de Watermölle stund töt vuur kort nen hogen boom. Vanweage de nieje inrichting mos den wieken. Begriepelik. Mer non steet der een onbedudend, skarminkelig spierken, op precies deezelfde stea. Tusken twee boompöale, want stelt oe vuur dat he ummeweeit. Iej zollen zeggen: had dan den olden loaten stoan.

Mer van nen kunnigen heuren ik dat et hier wet is um beume noa nen bepoalden leavtied dale te hauen. Dan wordt ze te groot en kriegt ze te völle blad. Per boom is dat een poar euro te deur um op te rumen. Aha!

Non heb ik nen blauwen moandag bie nen hovenier elop en weet ik ongevear wat der bie kump kieken um zo'n moat an de vlakte te kriegen. As eerste mut der een vuurnaam stel hearskoppen een uur skoapachtig um den boom dralen um te kieken of he wal echt dale kan. Dee skrievt dan lange rapporten vol deure wöörde, woeroaver ook wier vergaderd mut worden.

Et besloet valt, de vergunnige wördt oetetikt. De kearls jaagt der hen, een buske vol kettenzagen vuurop, trekker met versnipperaar der achteran. Onder weuste roazernieje vret zik de knetterbiele duur 'n boom. Woart oe en van onderen! De ziedtäkke der of, 'n kalen stam in korte bölle. Gröttere stukke op 'n anhanger en ofvoren, täkke duur 'n versnipperaar. Met 'n betten geluk nog nen stobbenfrees der bie, want den boom had zit toch wal oardig vastegreppen.

Eandelik is allens der oet. Nen specialen hoog-opeleiden professionelen kwalificeerden (deuren) stadsinrichter bog zik oaver et vroagstukke wat der vuur wier mut kommen. — Ik zol zeggen: nen truurwilg, mer wee zin ik? — Natuurlik ene den as ons greutse stadse karakter benoadrukket (non, da's elukket). De gemeentekearls magt hen en wier jagen um ne van 'n kweker te halen, in te graven, drainage en zäkke met mest der umhen, boompöale der nöast, boomlear der an, nog eaven met 'n joesterbessem der umhen zweeien…

Wat kost dat an benzine, beume, machines, materialen, man-uren?

"Mer Matn, den boom was ook nit monumentaal of 'beeldbepalend'." Klopt, monumentaal wordt ze in Riessen pas as ze 80 joar of eulder zint. En de grap is dat ze vanof dee tied ook pas een betten beeldbepoalend begint te worden. Mer op de een of andere wieze haalt ze dat in Riessen nooit. Et zal mie beniejen wo lange as dit spierken mag stoan.

En dan dörft ze et ook nog Boom-kamp te neumen.

Martin ter Denge


<SCRIPT SRC="//secure.adnxs.com/ttj?id=10195025&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>
Meer berichten
 
Auto zoeker
<SCRIPT SRC="//secure.adnxs.com/ttj?id=10195036&size=160x600&promo_sizes=120x600&cb=[CACHEBUSTER]&promo_alignment=center&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>
<SCRIPT SRC="//secure.adnxs.com/ttj?id=10195026&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>