Column: De olden

Foi wat nen klaagzang verleden wekke. De wearld vergeet, zo ko’w opmaken, want de jeugd van non, doar deugnt helemoal niks van. De strekking was ongevear dat al dat jonggebeente drieteverwend is:

“Kinder wilt rechtevoord enkel luxe: ze hebt slechte maneren, minachtet autoriteit, hebt gin respekt vuur eulderen en maakt kabaal op steas woer’t ze stille heurt te wean. Kinder zint de tirannen, nit de gedeenstigen in öar hoesholden. Ze stoat nit op vuur eulderen, sprekt öar vaar en moor tegen, babbelt honderdoet tegen vrömden, slikket bie de toafel, zitt met de bene oaver mekoar en terroriseert öare leararen.”

Woer he’w dat toch earder eheurd? Oh ja, van Sokrates. Den zea dat hierboaven al 2500 joar terugge. Vaste nit in et Plat. Wal in et Platiens, denk ik. Mer in ieder geval was Sokrates zinne tied wied vuuroet, of nit dan. Ne koo verget mangs dat he kalf hef ewest.

Völle interessanter as enkel mer klagen, is de vroage woer as de jeugd zo van ewörden is. Wee hef öar den iphone ekocht? Woer hebt ze dee witte skone en dee fietse van? Wee hef öar zo op oeterlik emaakt?

Misskien wal dee generatie dee de dure bie Kapper Joop platlöp um de hele jeugd oaver enen kam te skearen. Wee zal et zeggen.

In Zweden löp een meaken met ne mooie eulderwetse name. Den maakt zik drok oaver opwoarming en verslatering van onze wearld. Verslatering duur dee leu wat öar vuurgungen en non anderen zegt wo as et heurt. Honderddoezenden wichter volget dat meaken. Allemoal op öaren iphone. Ondertusken hef dat meaken et mooi vuur mekoar ekregen dat hele volksstammen nit mear met et vleegtuug wilt, mer es wat vaker ’n trein nemt. Of de cortinafietse. Ze gavven öär op vuur nen pries, den’t he met kop en skolders wun. Van et ewunnene bedrag met zes ciefers had he heel wat nieje Nikes können kopen. Mer nikkes doarvan: hee doneerden et volledig an de gode zaak.

Verleden zoaterdag zat ik bie Oarnd van de Skimmels vuur. Een köppelken van dee verwende drietjongs kömmen an op öare glemmende cortinafietsen en vreugen Oarnd of he nog wat in ’t vat had. In keurig Riessens! Dat had he. Dat verzoeren in ieder geval nit. En de höare zatten öar volgens mie ook wal good.

Misskien mu’j es wat vaker met de jeugd kuieren, as enkel oaver. As iej oe drok maakt oaver et jonge volk, bedenkt dan dat et met oe ook wal good is ekömmen. Tegen alle verwochting in, ha’k hoaste zegd.

Martin ter Denge

Meer berichten
 
Auto zoeker