Column: Ne Vekaantie oet 1954...

Vieftene wazze viej: Oarnd, Dinant en ikke. Viej wollen kamperen, fietsen noar nen camping, met ne teante. Viej konden d’r ene huren van nen belastingambtenaar, nen dubbeldaks shelter oet het leager. Oarns in de buurte van Veenendaal, doar wolle viej op an. As de teante op ’n bagagedreager van de fietse lea, kiepten de fietse automatisch achteroawer. Viej gungen ’s moarns op pad met de taske vol stoete, binnenduur richting Klarenbeek, verdan langs Hoenderloo en Otterlo op Ede op an en oonderweggens de stoete op egetten biej een cafeetje, met een fleske Hero Chocomel, ’n könnink te rieke. 

In dee tied ha’j nog steenpuuste. D’r zat d’r ene op de binnenkaante van de rechter knee, en dus oppassen da’j d’r nit met tegen de stange van ‘t frame kömmen want dat dee alderbarstend zear. In dee tied kreeg bekaand iederene wal ’n moal nen steenpoes, in ’n nekke, oeweral kon d’r ene beginnen en dan doerden ’t minstens ne wekke ear den poes “riepe” was.

’t Begun te reagenen en ’t was al duuster in Veenendaal. Doar ha’j nen pelitiekeal. Hee heurden oons an en zea: “ Volg me maar.” Hee brach oons noar de bakkerieje van Wallet. Of ze nog dree jongs oonderdak konden gewen? Gen probleem, ze harren zelf al dree jongs en viej mossen dat weekend doar mer blieven. Dee dree jongs van Wallet zeent later alle dree domiej ewörden. 

Zo: dus viej kömmen oet Riessen woer ze net ne Noorderkoarke harren met 2400 zitplaatsen? Oké, mer zée harn ds. Kok, den kon preaken as te too! 

’s Zoandeangsoawnds met noar de Jongelingsvereniging, met Rik Valkenburg as vuurzitter, later bekeand as reformatorischen schriewer. ’t Gung d’r depe duur, iets oawer het anbod van genade, het jongvolk doar was better van de tongreem esneden as dree greune Tukkers dee bedremmeld de rappe discussie volgden. 

’s Moandeangs gunge viej noar nen camping biej Leersum, “het regende maar en het regende maar en Bello lag onder de kar” aldus W.G. van der Hulst. 

Viej zaten hele deage in de duustere teante, knooiden wat met nen spiritusbraander en kochen ansichtkaarten met “Groeten uit Leersum” vuur oonze respectievelijke scharreltjes. 

Wier op hoes op an. Noa al dat fietsen kon ’n steenpoes oet edrok worden, en dan was het van belang dat ook de kern ’n vulkaan verleut. “Nen dorn” neumden ze dat. Volgens Wikipedia was nen steenpoes te daanken an ne ontsteking van het oonderhoedse hoarzäkn. Viej brachen de teante wierumme. Of ’n belastingambtenaar dee vief geulden huur op egewen hef as bijzondere inkomsten, joos mag ’t weten.

Vuurbiej, wisse, vuurgood vuurbiej…

Gerrit Kraa

Meer berichten
 
Auto zoeker