Foto: Gerieke ter Denge-Pluimers

Platte column over kul-tuur

Et is éne grote samenzwearing! Wiej wordt ummevolked en al onze kultuur wördt oetewisked! Kiekt mer noar Zwarten Piet. Noe is der de wille wal of as ze ons zo dwingt um onze egene dinge an te passen. As zelfs Zwarten Piet al neet mear mag… En blanke vla dan, zeg ik altied. Noh, ik zegge nog altied gewoon Negerzoenen heur, dom gedoo. Kom noe toch of neet dan.

Hey heb iej minnen niejen Dodge Ram al ezeen? Wat nen dikken bak hè? Nee, zunige Europese wagens dee’t mooi van vörm zint, doo’w neet mear an. Et mut oet Amerika kommen, lellik, onbenullig en veerkant. En vuural een dik geluud mut et maken, want dat gef an wat vuur nen onwies toffen kearl as ik zelf wal neet zin. Dat ’n motor dut van brulululululu, hoh, wat fein. Iej heurt em sleutern. Net as ikzelf hahahaha. Wal lastig in dee krappe ströatjes hier, loat ze doar es rekkening met holden. Iej könt met gin good fatsoon mear parkeren.

Al oonze kultuur wördt oetewisked!

Wat zeg iej? Sunte-Marten? Met nen lantearn of nen foekepot? Zingen van “Suntematmans veugelke, met dat rood rood keugelke” en dan bie wildvrömde leu slikkerieje bedeln, dat mu’j de wichter toch neet learen. Olderwets man, dat doo’j toch neet mear? Nee, wiej doot an Halloween, want dat is toch zo mooi. Dan doot ze Trick or Treat, en dan kriegt ze een snoepje.

Nee, wiej doot an Halloween, want dat is toch zo mooi 

Twents kuieren? Ach, oaver een paar joar is hier toch allens Engels. Of Arabisch, höhöhöh. Twents. Pff. Wee dut dat nog? Nee wiej leart et Jayden/Finn/Infinity/Lashontay zelf neet, want as nums et dut wat hef et dan nog vuur zin hè. Wat zeg iej? As iederene et dut hef et wal zin? Kearl in wat vuur nen tied leaf iej?

Vuur at onzen Otis geboren wör ha’w toch zonnen mooien genderrevealparty. Leu stunden der echt van te kieken, mer et geet natuurlik vuural um Insta. Ja de vrouwe had lever een meaken ehad, want dan kon ze mooie klearkes halen en dat past better bie öar egene outfit op de instafeed. Ja, kroamskudden vunde wiej toch wat van vroger, wiej wollen wal es wat anders.

Mer nog meuier was de cakesmash. Wat hef onzen Otis lekker esmeard vuur de kamera en wat ne wille toch hè. Lekker kliederen deed dat wich, hee höw den taarten dan toch eaven vakkundig an drek, direkt vuur instagram der met. En iederene op Insta deed van “wat een riekdom”. Prachtig, verget mie nooit wier. Ik loate oe de foto’s nog wal zeen binnenkort op de Housewarmingparty van Jan en Lisa.

Nee heanig an pakt ze ons de kultuur of.

Martin ter Denge

Meer berichten
 
Auto zoeker