Foto: Jan Joost

Platte column: Enterse warmtepomp

zo 8 mei 2022, 12:12

De hele wearlnd keant Enter, zengt ze in Eanter. Dat gräpke keant alleman, kiekt mear op oewne typmesiene, sleptop of i-pädje. Op zonnen rechthook steet dulek ‘enter’. Mear det wil nog nit zeggen dej Eanter of better gezegd nen Eantersen kent. Ik gewe too, de-k miej glad ies en gevoarlijk terrein beweage. Met de meeste Eantersen köj jums best te doon hebben. Mear verdreeid zeent ze. At het leenks is, zengt zée dat het rechts is en umgekeerd. Ze ‘heurt’ oonder Wierden, mear mun der niks van hebben. Een deel is zelfs oriënteerd op Goor en een grötter deel hef mear met Riessen.

Eantersen warn van vroger oet al zaaknleu. Det dan wal wier. Gin productiebedriewe wat naam hef, mear ze koant de handel wal good oetveanten. Echte febrieksoarbeaiders zeent het ook nit, want as loonslaaf an de lopende band, det past eur nit. Eanter hef gewoon een poar hele mooie bedriewe. Autobedrief Slag, de Rohane, Rikkert, de klear-Boone, de T-bone of de vrette-boone, de Coulissen-Boonen, en de keunstverzamelaar ’n langen Gerard van de Boone van de Bullenhaarsweg. En netuurlijk en nit te vergetten ’n Homan.

Alle huze van ’n Homan köj zo wierkennen. Jaangt eens van Eanter noar Goor, oawer de Gooise weg. Het wemmelt van Belgisch andoonde kasten van huuze. Huuze met skosteen woer at een heanig helicopterke op kan laanden. En tuinen, nit met grös, greandtegeln en bielzen umdet de ceanten op warn. Nee, strakke landschapsmodéltuinen en een wagenpark vuur de dure om koold van te worn. Benaamd Range Rovers, Audi’s en vuurál gin Opeltjes, nen Mini Cooper vuur de dochter en mevrouw wol aaltied al gearne een Porsche met een lös dak. Nen hoop eleased, mear det zee-j an de boetenkaante nit.

Ook de leste snufjes in en um dee huuze, alns automatisch, zunnepaneeln um heel Eanter van stroom te können vuurzeen en iej zeet alverdan mear woarmtepompen ‘Joa, det dook vuur ’t milieu’’. Kortens heuren ik de oawertreffende trappe. Nen Gooisewegbewonner wol ook ne woarmtepoompe. Het hele internet noakekken wee at der verstaand van hef en woer at het vuur de pries is. Det mos duurgoan. Het was dan toch wal handig op watvon energielabel dee wonning dán oetköm. Ene den at dóar wier verstaand van had, köm langs um de zaak te bekieken en duur te metten. ‘Mear mevrouw, ieleu hébt al ne woarmtepoompe. Ik wil der oew best wal ene nöast zetten, mear det hoof echt nit.’

Iej koant ook duurdriewn.

Gerard Voortman