Foto: Jan Joost

Platte column: rendemeantsdeanken

Mangs mun oew de oogne lös worden e-doane. Det zee-j dan benaamd biej dinge dee aj duurmekoar deankt te weten, of van heuren zeggen of iej kuiert gewoon met de goegemeente met. Moar kloppen dut het vake nit.

Zo vergung het miej earlke gezeg ook wal een betje biej de leu in de bejaardenzorg. Leu dee vuur het woarken in de zorg kiest, weelt det jums zélf en jea, mangs is det hard woarken en noare dinge metmaken.

De meeste leu in de zorg hebt het harte op de goo stea zitten. Dee weelt éch leu helpen, een keteer länger as at op de vuurskriffen steet, doot ze met de wille. Det eur een dag dan oetlöp veendt ze nit slim. Dee trekt zik nit al te völle an van hoe völle minuten as ze hier en hoe völle minuten as ze doar munn wean. Verpleegleu dee at ten deepste niks van excelliestjes munn hebben, en gruwt van ingewikkeld bureaucratisch genöal.

Ik maken het ofgelopen twee joar an de lijve met op het Riessense verzorgingscentrum Maranatha. Maranatha besteet dit joar 50 joar. In ’t begin woln de Riessenders der nit hen, later wal en de meeste leu zeent tevreane of better gezegd heel tevreane oawer het personeel op de woarkvloere.

Meaks dee’t zik oet ’n noad leupen in de tieden van coronacrisis. Päkke an, päkke oet, vuurzichtig hier en vuurzichtig doar, ze steun mangs tusken de leawndigen en de doden in, mear ze mossen wal verdan.

Ze zeent der nog: de Ria’s van Beneadskes, de ultieme nachtzusters, dee at an énen blik op ‘n patiëant in de gaten hef hoe at het zit; de Joanne’s van Wilma van Mans van Freulnreaint van de Hoar. Jonge meaks dee ‘t noa euren diensttied nog eawn biej min va en moo angungen um te kieken hoe of wat ‘t met eur was; de Endrie Altinks, mooi twee-talig doon met de leu en gewoon Mans en Jenke of mangs zelfs Jenne-meuie. Herkenboar vuur de leu en ook an een half oge genog. Het gevoar van naams neumen is da’j leu verget, mear ik heb hier ook mear 450 weurde, dus dan doo’k vast wal een poar te kort. Mer det is nit willemoods.

Mear jea, wat zol ‘t management doar van zeggen as ze dit least? Det is doar 4,5 minute te lange en doar mut de indicatie dreks noar boawn hen. En doar dee’j te völle wat helemoals nit in oew functieprofiel past en zo kö’j nog wal eawn verdan goan. Wee’j wat? Viej köant der wal ene oetdoon, want viej wordt of-erekkend op het rendemeant.

…Vót met det rendementsdeanken in de bejaardenzorg.

Gerard Voortman

Meer berichten
 
Auto zoeker