Platte column: hond

Verleden vriedag was et wier es zowied: as muziekkearls mo’w de leupers van de oavendveerdaagse binnenhalen. Dat geet al joaren zo. Dan köant de leupers ‘achter et muziek an’ en feestelik oaver ‘n eindstreep.

Onze trommen maakt kabaal. Heel völle kabaal. 115 decibel hale wiej met gemak. Dat is zo hard dat leu langs de kanten et hoaste neet köant ofgriepen, zo rap as ze zik de vingers in de oren stekt. Neet vuur niks doo’w met de möage zelf ook altied repeteren met ørepropper in. Van de ARBO mu’j dat al vanof 85 decibel. Kö’j noagoan. Flauw gauw gräpken: ‘Ik belden es met de tinnitus-hulpliene, mer kreeg enkel et antwoordapparaat: “spreek uw bericht in na de piep.”’

Onze trommen zint speciale Amerikaanse modellen: ultra high tension. Extra hoge spanning. Met extra dikke rände um den spanning an te können, anders foekert oe ’n helen kettel in mekander. A’j der op spölt is et net o’j op nen stoeptegel hauwt, zo hard. En ook zonnen terugslag. Spiekerbäkke neume wiej ze wal es, want et geluud is kort, dreuge, hoge en hard. AKELIG HARD. Et knarsket oe duur ’n kop. Et is ja bedoold um in de boetenlocht extra wied eheurd te worden. A’j der dan in nen optocht de leu rakelings met langs de oren loopt, ja dan kan dat wal es zear doon.

Langs de kanten stoat bie dee optochten altied een tot dree domme kleute. Iets anders kan ik ze neet neumen. Met ’n bek half lös en de ogen op half zeuven met ’n snotterd vuuran te gapen. Met nen hond an de liene. Van dee leu dee zik dan derenleefhebbers neumt, mer te stom zint um te bedenken dat nen hond veer moal (VEER MOAL) sköarper heurt as een menske. Terwiel as der viefteen (15!) kearls met trommen langsloopt.

Iederen optocht wier zee’w hunde in totalen paniek untersteböaventen en achterstevuurten an et touw worstelen en martelen um te vluchten vuur et kabaal. Ze blekket en de ogen kuult öar hoaste oet ’n kop van bangigheid. Kats van de wieze. En öaren beul öah baas niks as heisteren um ze tegen te holden. Dat is nog es mishandeling. He’j noe echt neet mear verstand?

“Och, hef den van ons niks gin last van heur. Zeet em es mooi heanig liggen.” Misskien is dat een teken dat he duurhef dat he ginne kante oet kan?

Hartstikke mooi da’j niks wilt missen van onzen optocht, mer loat oewen hond in hoes a’j der zo gek met zint.

Martin ter Denge