Column: Kolnboertje

Non at het wier zommerdag is, zee-j aoweral van dee rootwealme van leu dee at nit barbeceën koant, mear wal van dee grote ‘buitenkeukens’ hebt en van ‘outdoor cooking’ hooldt. Dee haalt dan zo’n metaaln Weber-deenk an, doot nen groten learnen skölk vuur en stekt de koln an. Meestieds geet het dee leu nit vlot genog, en geet der een betje toarpetien biej. Det helpt dreks.

Oh jea, een poar stokbreure, zeuwn soorten saus, ne koelkaste vol kooln beer en mear stokken. Een vleaispakketje met frikadelkes , kleane bölkes kip en hamburgertjes en dan dreejn en dreejn totdat het van boeten zwart is en dan ‘’den is al wal zowat goar, et mear op. Good noaspeuln“. Zo vergeet het de meesten.

In Wierden in ’n Haarbos, doar woer at in ’n Oorlog ne startbane was van de V1 , lig een perceelke van de femilie Ten Cate en doar drif Mark Lommers alns wat met éch BBQ-en te maken hef. Mark kan vlot kuijern, koomp sympathiek aower en hef biej grote beursgenoteerde bedriewe woarkt. Völle van ’t hoes en völle geeld verdenen. Det mos aanders, dachen Mark op een gegewen moment en begun van oet het niks met grillen en BBQ-en. Volg je passie zengt ze dan vandage an n dag.

Hee pakt dee BBQ-workshopperieje professioneel an. Het vleais koomp van beeste dee at 11 moand in Uruquay hebt roond-ezwöarven, water dreunken hebt oet de rivieren doar, dan 200 dage röstig op n stal, woer at ze graan kriengt woer het vleais ne oart zeute smak van krig. Mark kan oe det zo mooi oetduutsen, de spieje löp oe vanzelf um de kennebakke hen. Benaamd at-e oe verteelt dej doarduur intramusculaire vet dúúr het vleais kriengt in plaatse van der óp. En ‘n THT-doatum wordt ook völle geunstiger.

Viej hebt het dan aower 200 beeste per joar woer at hee de meeste delen hierhen löt transporteren. Plaatselijke anvoer oet Wierden of Eanter zol-e wal mooi veenden mear dee köant net nit dee constante kwaliteit én antallen leaweren. Biej het Kolenboertje (wat nen onprofessionelen naam Mark - jea, kan wal wean mear iej verget het nooit wier) gin sauzen of stokbrood. Gewoon meterslange zalmziedes en grote bölle vleais trechte maken met zoolt en pepper en wieters niks en votspeuln met verskilnde soorten Belgisch beer. En ook nit van dee Weber-kettelkes mear van dee keramische metershoge Green Eggs. Doar blif de hette in hangen. Ook nit kets vol met hooltskoln mear nen steen der oonderin um de hette länger en geliekmoatiger vaste te hooln, ééndoarde löag en ééndoarde hooltskoln dus.

Oh jea, aj zalmziedes grilt, doot der dan een stukn appelboomnhoolt op. Dan kriej der zonne angename rökke an.

Vuur good 100 euro den man krig Mark zelfs vegetariërs an ’t vleais.

Non iej wier.

Gerard Voortman